නව අවුරුදු

එරබදු මල් පිපෙන්නෑලු

රබන් සුරල් වැයෙන්නෑලු

එරබදු වැටියම කපලා

කොහා “කොහො!” කියන්නෑලු

පවන් පොදට සුවද කැව්ව​

වන මල් දැන් පිපෙන්නැද්ද​?

සපු දුනුකේ පිපුණ බැද්ද​

පාළුවෙලා ගිහින්වද්ද​?

වස් දඬු ගී වැයෙන්නෑලු

වාරම් කවි ඇහෙන්නෑලු

ගමේ ලමිස්සියන්ට දැන්

රබන් පදත් මතක නෑලු

ඇල දොල දිය කඩිති සිඳී

ගම නිහඬය නැතිව සද්ද​

හිස් කළගෙඩි පෙළට හැදී

පිඹිනා තුරු බලා හිඳී

යලමහ දෙක පාලු වෙලා

කුඹුරු යාය පුරන් වෙලා

කලට වැස්ස නැති හින්දා

අටු කොටු පතුළට හිඳිලා  

බත සරිවරි කරනු කොහොම​

අත මිට හිඟ දැනෙයි බොහොම​

ගොයි රාලගෙ පපු කැනැත්ත​

දෙදරාවිද​ හූල්ලලම​

නැකතට ගනු දෙනු  කරන්න​

සළු පිළි ගත දවට ගන්න​

අපිට හුඟක් මදි පාඩුයි

අවුරුදු කුමරුනි නොඑන්න​.  

මල්ලිකා එම් බණ්ඩාර​

14. 04. 2019