පන් පැදුර

 පන්ටික නෙලා තොටමුණ ළඟ පිල්ලෑවේ

උල් දිය විලෙන් දෝවා ගෙට ගෙන ආවේ

අහසක් උස හීන මැද පන්නම් ලෑවේ 

මගෙ පන් පැදුර එලුවා පිල මැද්දෑවේ 

ඊයෙත් සතපවා වැහිබර හැන්දෑවේ 

මගෙ ගත සිත නිවපු පැදුරට හිත්ලෑවේ

ගෙට පැන පැදුරු ආණෙන් අරගෙන දීවේ

ජඩ කම කළේ කවුරුන් දෝ ඇන්නෑවේ 

දෙන්නට තුලාබර නැතිකොට වපසරිය 

කල් යල් ගිහින් පන්නම් පිරුමත් බැරිය​

ජාතිත් නපුරු හිත් ඉපදීමත් බැරිය​

මගෙ පන් පැදුර දෙන අය නෑසියො සරිය​

මල්ලිකා එම් බණ්ඩාර​

26. 08. 2026