දවසේ සිතුවිලි

ජනපති උවසු බුදුගුණලකර පිරිසිඳ​

දැන බණ වදාරති වෙහෙරක ඇදිලි බැඳ​

අගමැති උපාසක ලිච්චවි දහම් කඳ

දැහැමෙන් සෙමෙන් වපුරයි මැති ගණා මැද​

විශ්‍රාමික සුවය දුකයයි හඟින ලද​

නිරිඳෝ රකිති පෙහෙවස් දෙව්රමට වැද​

දායක දනා සිව් පසයෙන් දෙවන​ පුද 

දෙව් සැප පතති ඒ උතුමන් පසෙක හිඳ

පලතුරු වට්ටියයි අටපිරිකරයි අරන්

පිරිවර සමඟ උතුමෝ පිරුවටය දරන්

එන සඳ​ යාන වාහන තුටු පඬුරු අරන්

යතිවර මුනිවතිනි හිත තුටු පහටු කරන්

පුද පෙත් කාජ භෝජන​ වර දාන අරන්

පව් කඳු ඇවිත් පා මුල වැඳ​ වැටුණ ගමන්

උජු පටිපන්න වෙන්ටත් බෑ හිතන තරං

සුව වළඳනු හැකිද පදවිය අහිමි කරන්

බුදු මැදුරට යාව ​ දෙවොලට පුදන ලද​ 

පිං කැට නිවන් යන අත​  වියදමකටද

භව දුක නසන මඟ මිස දෙව් ලොවක වග​

දෙසුමෙන් නිවන, සග-සැප සම​ කරනවද​? 

වපුරා නෙළා පව් බිජුවට පැහෙන තරම්

ආවාසයේ වාසය දැන් අකැප තරම්

මහපා වල විඳින සුඛ විහරණයෙ වරම්

තුන් දොර වහන්නට යන වෑයමට​ හරම්

මල්ලිකා එම් බණ්ඩාර​

9. 03. 2019