මිහිකත උරණවී​

ලැව්ගිනි ඇවිල ගව් සිය ගව් වටේයා
මැව් දුම් වළලු ඇවිදින් වට පිටේයා
අව්වැලි මකා යන එන මඟ තොටේයා
තව්වක් නැතුව හෙව්වා  අප රටේයා

සුවහස් සතා සීපාවුන් දෙරණ  හොවා
තණපත් වන වදුළු තුරු හිස් එකට දවා
මිහිකත උරණවී​ ගිනිසිළු දසත​  ලවා
පරලව හිඳී  නෑරම නෙතු සඟල පවා

උස් මිටි බේද වත් පොහොසත්කම් දරනා
විස්මිත ලොවේ නෙක නව පෙලහර  කරනා
හිත්පිත් නැතුව  මහ පොළොවට විනකටිනා
ඇස් ඇර බලමු මිනිසුනි වැරැදුනෙ කොතනා

නිමැවුම්කරුට නිමවිය හැකිවා සේම
වැරැදුන තැනත් නිවැරැදි වියයුතු වේම
දසවධ දිදී වැනසූ මිහිකත කෝම
ඉවසන්නට ඇද්ද අපි කළ හැමදේම​

මායිම් වැටට බිම් අඟලට පොර කෑව​
යුද​ ගිනි මවා මිනිසත්කම  වල ලෑව​
දෙවනත් කළෙන් මිහි මඬළෙහි සිරියාව
මේ හැම විපතටම මුල වෙයි මිනිසාම

මල්ලිකා එම් බණ්ඩාර
6. 01. 2020