"​කාඩ්බෝඩ් පෙට්ටියක් දරුවකු බිහිකරයි..." - පුවතක්!

දෙව්‍රම් වෙහෙර දොරටුව​ ළඟ උදෑසන​

ඇත් පැටවෙකු වදා කෙණරක පලායත​

සතවෙත පතල මෙත් කරුණා දයාවෙන
වනයේ ගිහින් ළෙහි සෙනෙහස දරාගෙන​​

උක්දඬු සමඟ නෙක පලවැල නෙලාගෙන​

උහු රැක ගනු ලැබිණි මහ යතිවරාණන​

දරුවන් මඟ දමා යන ගැහැණුන්ගේම

එය පැතිකඩක් වී ඇත ලෝ දහමේම​ ​​

දින දහයකට මව් උණුසුම නැතුවාම

කඩදහි තොටිල්ලක තනිවම නිදි යෑම​

පුතුනේ ළපැටි ගත උහුලන්නේ කෝම​?

​

ලැව් ගිනි උකුළු ඕවිල්ලෙන් ජනිතකළ​

මව් තනපුඩු පහස නොලදිනි​ ​බිළිඳු තොල​

කිරිදරු පැටවෙකුව මහමඟ දමන කල​

අඳ නෙත නොදිටි ජීවිතයක නොනිමි මිල​

ලේ රහ වන තුරා හඬනා සිඟිති මුවින්

ලෝදා සසලවිණි ​කම්පිත සුසුම් වැලින් 

කිරි පීරක් ගලා නොඑනා සෙනෙහෙ දොලින්

අම්මාවරුණි තැනුණිද ළය මඬළ​ ගලින්?

අල්ලා දෙවිඳුන්ට යැද​  ඉකිගසන යුරෙන්

ඉල්ලා පිළිසරණ සවනක රැඳෙන සරෙන් 
දල්ලා මිනිස්කම ඇති හද වතක් කෙරෙන්

නුඹ ජීවිතය ගැලවුණමුත් වැටුණ නිරෙන්
ස​ල්ලාලයන් නෙරපාවා මිනිස් කුලෙන්!

මල්ලිකා එම් බණ්ඩාර​

03.08. 2016