බෝදරාළ​​ (The Messenger)

කටු ඔටුණු නොපළඳිති

මිනිස්කම වෙනුවෙන්ම කැප වෙති

හිස් අතින් ආවෝය

ඇඳි වතද අහිමිව ගියෝය     

විරුවෝ

නිදනන් වත් පැහැර ගෙන​

රන් රිදී මුතු මැණික් පොදිබැඳ​

සොරුන් ගේ කඩුපතට ගොදුරුවී

නොමළෝය විරුවෝ

දිළින්ඳන් ලැබිය යුතු බිං අඟල,

බත බුලතද, පැහැර නොගනිති විරුවෝ

මංමුලාවූවන්ට කණහුලක් වනු මිසක​

සැඩපහර කර වටක් දඟ කැවී ගිලෙන විට​

අත්වැලක් වූවෝය උන්

වරදාන පඬුරු දැක තළු මරා කෙළ හලා

අදමිටුවන් සමඟ ලැග​,සිඹ උන්ගෙ මිරිවැඩි යුග​

උතුරු මිනිසත් කමට​ නිගා නොකරති

විරුවෝ

දේශයේ හෙට දවස කිඳාබැස යනු දැක අගාධෙක​

දෙපයින් නැගී සිට ළය දුන්නෝය උන්

ඉසුරු දැක​ මසුරු නොමවී

පිය මැන්නෝය විරුවෝ

දැක දිනුම හෝ පැරැදුම පාවා නොදෙති අරමුණ​

පැන නොයති අතැරදා පෙරමුණ

මළත් උන් නොමියෙත

උන්ගෙ නම​ ජන මුව'ග මැතිරෙත​

වගුරු බිම පිබිදුන මලක් සේ මනකල්ය​ සුවඳය​

​සිඳිත මඬවත එද​, සඳුන් හරසේ සුවද විහිදත

පොදු දනන් හද තුළ ගිනිසිළුව සේ දැල්වෙන​​

නවෝදයේ පණිවුඩය දැයට​ම රැගෙන යන

පෙර ගමන්කරුවා නම් නුඹය​.

            -

මල්ලිකා බණ්ඩාර

03.07. 2016