නැළවිලි ගීයක්!

ආ ගිය හැම තැනක​

රුදුරු වන සපුන් මිස

නොදුටු මුත් දෙවියන්,

නුඹෙ හද ගැබ පිරුණ​

අමාමය​ සෙනෙහසින්

හැඳින්නෙමි දේවත්වය

අනන්ත​ සසර ගමනේ
නිමෙසකදි මා ලද​

මනරම් නවාතැන්පොලද​,

කුරිරු ලෝදාව​ තුළ
​පෙර පසු ගමන් ගිය​

මුර දේවතාවියද​ ඔබය!

ගොර බිරම් සසර කතරේ

මා සැතපවූ තුරු සෙවණ!

ඒ තුරු සෙවණ යට​ මුදු පවනැල්ල වූ

මා පවස නිවන්නට මධුර උල්පත වූ ​

නිවා සැනහූ දොවා නැළවූ  
ළබැඳිණිය​ අම්මාය​!

දිය සීරාව කැණ​

තනා දිය කඩිත්තක්

ඒ දිය කඩිත්තම

පස් පියුම් විලක් කළ

නුඹ, මා නිසා හෙලූ

කඳුළු දහදිය රුහිරු

කුමට සම කරන්නද​
 මට ජීවිතය දුන්අම්මේ?

ජීවිතේ රළු සර පහර වැද

මහද පාරන ලද​

වන කැළල් පිරිමැද​

මා සිත නිවන්නට

මධුර නැළවිලි ගීය

ඔබම වූවාය​ අම්මේ!

ඔබෙ සුසුම් මුසු පවන​

ලෝ කුහරය සරා විත්

නැළවිලි  ගීයක්ව​

අදත් මා සවණත​

තැවරුණා මුදු සරින් අම්මේ!

මල්ලිකා එම් බණ්ඩාර​

7. 07. 2019