උත්තරීතර සභාවේ ...

 

උත්තරීතර සභාවේ ගරු කටයුතු උතුමෝ - 23.02. 2023

වස්තරේ පසෙකින් තියා රජු අන්දරේටම ඇඳගනී

උත්තරීතර සභානායක​ තිත්ත කුණුහරුපෙන් බනී

තෝන් ලණුපට අතැති පඹයෙක් මුලසුනේ හොට බිම ඇනී

උගේ ගොන් රැල දිගට හරහට බෙදී උනුනුන් ඇන ගනී

ශෝක ප්‍රකාශයක්

 ළසඳපතසේ මහද අහ​සට

මෝදුවුණ හන්දා 

යලක් පැහුණා වගේ දැනුනා

නුඹට බහ දුන්දා

 

කලක් ගතවී ගිළිහිලා අත

​ගියද​ නුඹ හැරදා

විරහ තාපෙන් දැවුණෙ නෑ හිත

​නුඹට සමු දුන්දා

 

සසල සිත් විල කුමුදු යායට

තරුඑළිය දුන් හින්දා

නැවුම් විජිතෙක රැජින වූයෙමි

කිරුළු හිස රන්දා

 

මතක එක දෙක ඇවිත් ඉඳහිට​

කළත් කෝලිත්තම්

ඉසිඹුලන්නට නොදී

දොරගුළු ලීමි කර ඔච්චම්!

 ​

මිතුරු හමුවක පුරන සව්දිය

විතක රස පහසින්

සලඹ රෑනක් සේ අතීතය​

තටු සළා ඇවිදින්

 

අහඹුවක නුඹ නික්ම ගිය වග​​

අසන්නට යෙදුනෙන්

සඳ ගිළී ගිය රැයක​ වල්මත් වුණා

මා සැණෙකින්

 

මල්ලිකා එම් බණ්ඩාර​

24. 02. 2023

අන්තිම කැමත්ත​

 

හැංගි හැංගී හිනා මදුවැල් පිපුණ සිය දහසේ

සඳත් නුඹ විය ඉරත් නුඹ විය මෝදුවුණ අහසේ

තාම නොයිඳුල් ප්‍රථම ප්‍රේමය නුඹට පිදු විලසේ

මාත් කැමතියි නුඹත් කැමතිද යන්ට එක දවසේ?

බිඳුණ අත් වැල නැවත බැඳ බැඳ රිදුණ හිත නොමදා

ගමන නිමවෙනතුරා යන්නට ගිවිස ගෙන හැමදා 

මෙතෙක් දුර දුක සැප එකට ලද එක හිතින් වළඳා

හුදකලා මඟ යන්ට තනි ඇති ළඟක මා නැතිදා

 

තිබුණ කඩමලු කිහිලි ගහගෙන මගෙ පැලට ඇවිදින්

බින්න බැස්සේ නිකිණි පෝයක වැහි වැටුණ පැයකින්

දබරවී බැන අඬ ගහන්නැති නිකරුණේ  සැනෙකින්

නොදරුවෙකු සේ පසු තැවෙන්නැති නිවී සිත කොණකින්

 

 තණග පිනිමුතු පොකුරු පිසදා ළහිරුකෙඳි රැහැණින්

 මියැදි ඊයේ සේම අවදිව බලන සඳ යහනින් 

නියත අනියත බව මෙනෙහි කර නිවී ගිය පහනින්

අදක් මිස නූපන් හෙටක් ගැන කියන්නද කෙලෙසින්​

මල්ලිකා එම් බණ්ඩාර​ -

13. 02. 2023

ජවය​

 

මනෝ මන්දිර ඉදිව බිඳුනත්

පෙණ බුබුළු විලසින්

ලෝකයක් ගොඩ නැඟෙනු කෙලෙසද

සිහිනයක් නැති නම්?

 

රළ පතර වැද වෙරළ සිඹිනා

වැලි තලා අතරින්

තැනූ මාළිග දියව යද්දී

එක් අසුරු සැණෙකින්

 

පාදමේ සිට නැවත නැවතත්

නව මුහුණුවරකින්

තවත් පහයක් ගොඩ නඟන්නට​

හිතට​ දිරි ඇතිනම්

හඬා වැළපී වුණත් කම් නැත

යළි නැඟී හිටපන්!

 

බිඳුණු පහුරත් කැඩුණු හබලත්

දියඹ වෙත යානම්

නුඹම ඔරුවක් වෙලා වෙරළට

එන මඟක් හිතපන්!

උරුම​ නටබුන් අතර කුරගා

විසුල කැට කැබිලිති ඇහිඳ ගෙන

 දෙපා මත නැවතත් හිඳින්නට

ජවය නුඹ පමණක්ම වීනම් 

තැනූ නිමැවුම් ජීවමානව

හිඳියි නුඹ පසෙකින්!

 

මල්ලිකා එම් බණ්ඩාර​

11. 02. 2023

විජිණිපත (Memory of my beloved mother - 07th of February, 2023)

 

සුගම පද වැල් සොයා ළතවෙමි 

එකම එක කවියක් ගොතන්නට​​

නුඹේ සෙනෙහස් සිඳු ගැඹර බඳ​ ​

කිමිදි කිමිදී තවම  අම්මේ

 

ඇට මිදුළු සම් මස් දියව යන​

තුරා වෙහෙසී දුකිනි අපමණ 

බුමුතුරුණු මත මා හොවන්නයි​

රළු පරළු මඟ නුඹ  ඇවිද්දේ 

 ගලන උණු ලෝදිය කඳුරු බිඳ 

දරා අව් වැහි අකුණු හඬ මැද​​ 

කුරුස ගහ උර මත හොවාගෙන​

වැටි වැටී ගොල්ගොතා නැග්ගේ ​

 

මගේ පාපයෙ බරත් උසුලා

සාපයේ වන්දියත් ගෙවලා

නුඹම පුදසුන යාගපෙත විය​

සාමයේ සුබ අස්න උදෙසා 

අතින් මොළවනු නොහැකිවන මුත්

නෙතින් දැක සිත පින​නු බැරි මුත්

සහස් සෝදුක් තැවුල් නිවනා

මගේ රන්මය විජිණිපත නුඹ​

 

පිපෙන පරවෙන මලක් ගානේ

කුරුළු ගීතනු ගැයෙන යාමේ

මසිත නැළවූ සුවඳ ධූපය​

නුඹේ සෙනෙහස පමණි අම්මේ

 

මල්ලිකා එම් බණ්ඩාර​

6. 02. 2023