ගඟට කැපූ ඉණි

 

හන්තාන කඳු වළල්ලට උඩින්  

ඉමක් නැති ඈත ආකාසයේ

වළා කඩ දෙබෑකර

පියාපත් විදා ගෙන

සැරි සරා දැනුනාද වෙහෙසක්

මට වගේ නුබටත්

 

මැකී ගිය සිනා කඳු සිඳී ගිය කඳුළු බිඳු

මල් ඉහුණ පටු පාර පීර පීරා සොයමි

භද්‍ර යෞවනේ පිපි ප්‍රේමය

නීල තණ පලස මත​

ගිළිහුණාදැයි බලමි

 

විඩා බර ගමන් මඟ

සිහිල් තුරු සෙවන යට

නතරවී මොහොතක්

එළාගන්නත් කලින්  

සිහින පන්නම් දමා   

වියාගත් පන් පැදුර

ළසෝ ගිනි අවුල්ලා

හොරු අරන් ගිහිල්ලා

 

අනෝරා වැහි වැටී ගඟ ඉහත්තාවට​

දෙගම් බඩ​ ඉවුරු බිඳ ගැලූ බොර දිය කඳට​   

වර පටත් පිදුරුවී අතර මඟ බිඳුන තැන​

කැපූ පැල ඉණි ගඟට ගිළිහිලා ගියා වන​

 

මල්ලිකා බණ්ඩාර​

 1.02. 2022

තල මල

 

මහවැළි නිම්නයේ උද්‍යාන තීරයේ

ගංඉවුර කෙලවරේ 

පිපෙන තලමල් සුවඳ 

පාවෙලා ඇවිදින් 

මතකයේ මං පෙතේ

කැන්දාන ගියා දුර ඈතකට​  

ගන්නෝරු වංගුවේ

ගං දඟරයට  යාව​

පුංචි කඳු ගැටය මත​

අපේ නිවහනේ සිට

බලා හිටියා කලක්

ගලායන අපූරුව මහවැළිය 

වැහිදාට සැහැසි වී 

ඇදුන හැටි වියරුව​ 

 

සිහින් මීදුම්‍ පොදක්

දුහුල් සළුවක් වගේ

කඳු ගැටය වසාගෙන

තුනීවී යන අයුරු අසිරියකි

ඒ අසිරිමත් නිමෙස​  ගිළිහිලා 

රැඳී ඇත හිත කොනක ගුලිවෙලා  

 

වෙල් යාය සිසාරා

ඇදෙන කිරිකොක් රෑන්

අඳින සිතුවම් රටා

පෙර නිමිත්තක් වගේ  

අනියතවූ සිහිනයක ​

ගියෙද​ සීසී කඩව ​විසිරිලා

නුදුරු  උද්‍යානයේ

අඳුරු තුරු මුදුන් වල​

ගිමන් හැර​ දිවා කල

උඩුකුරුව ලොව දකින​

දස දහස් ගණන් මා වවුල් රැල 

සැඳෑ කළුවර සමඟ​

පියාසර කරද්දී සළිතවී ගියෙද  හිත 

ඊතල වේගයෙන් පතිත වී 

වෙරළු දොඹ ගෙඩි වගේ 

ඇද හැලෙන​​ වැහි බිංදු

අතු පතර බිඳෙන විට 

කොපුල් තල තෙමා ගිය කඳුළක් 

මතකයේ බොඳ වුණා

තල් මලේ පෙති ගිළිහෙනා විලස​

 

මල්ලිකා එම් බණ්ඩාර​

 10. 03. 2017