අඳුර බිඳින්නට​

ඒරොප්පෙ හිට බන්දේසියෙන් ගෙනා දෝසිය​

පුරා හැට​ අට වසක්
ඒ හක්කෙන් මේ හක්කට මාරු කර කර​

කප්පරක් “බලවේග” වල කර පිටින් ගොස්

ප්‍රජාතන්ත්‍රවාදයේ මස්තකයටම ගොඩවීම

පුහ්! අපිට ​ආඩම්බරයි

අම්බරුවන්ට තණකොළත් ,

අශ්වයින්ට කැරැටුත් දී ගමන ඉක්මන් කළා

දෙදහස් පන්සිය වසරකටත් පෙර

හිටෝගත් බෝ සෙවනයට​ මුල් බැස​ හැදී

උරුම වුණ​ නිදහස් චින්තනය වෙනුවට

වැළඳ ගෙන​​ “නීලපටදර්ශනය”

ජාතියම ජාත්‍යන්ධ වුණේ මොන කරුමෙටද​?

"චින්තන", "සංකල්ප​"  රටා මැවෙන සේ

පද පෙරළි වණ පෙරළි තිතටම ගලපා.

සිවි කොනටම "වසන්තය​" උදා කරන​

උන්ට ඇති අපට නැති පවුර ඉදිකරනු වස්

නන් වණින් බබලන බලකොටු ගොඩ නැඟිණි.

කිරුළු පළන් රජ බිසෝ කුමර කුමරියන්

දියකෙළි, සැණකෙළි  සහ​ උයන් කෙළි

අතරතුර පෙම් කෙළින අයුරු දැක

අපි අත්පොලසන් දුනිමු​.

වියට බැඳ කෙවිටෙන් තැළිය යුතු

අම්බරුවන් රැළක් පුදබිමට වඩම්මා

ඇදුරු-මහැදුරු කුලද​, උගත්-නූගත්, ඇති-නැති

අඥාන බහු ජනා ලිහා සළු පිළි  තුමූම​;

උන් කුර ලොවිති. පැදකුනු කරති.

ගයති. වයති. තේවා පුරති.  

සත්‍යය වසන් කොට මිත්‍යාව වපුරනා 
ජාතියේ ගිහි පැවිදි මුරකරුවන්!
ප්‍රාසාද වල හිඳිති, වළඳති. 
යෙහෙන් වැජඹෙති !
අහෝ අප​ දිනු, ඇති-දැඩි වුණු
අසිරිමත් පුදබිමට කළ හදිය​ මුන්!
මේ අවිදු අඳුරෙන් 
මුදා ගනු පිණිස දැය​

කවදාක නම් පහල වෙද 
ප්‍රඥා ආලෝකය?

මල්ලිකා​ එම් බණ්ඩාර​

10. 10. 2016