තුරුණු පෙම් පතක්!

කියන් මම නුඹට දුන් පුංචි සුදු ලේන්සුව​

වහන් කර තියා ගත්තද ඇසක​ නොගැටෙන්න​

මා අතින් නිමා කළ රෝස මල් පෙති අතර​

ලියා ඇති " M " කියා මගෙ නමේ මුල් අකුර​

හමුවෙන්න බැරි නිසා දිනක​ අතරින්     පතර​

තැති ගනියි ඔබ​ මගෙන් දුරස් වේයයි    නිතර

පිළිසිඳුන​ පෙම වටින​ නිසා මහමෙර      විතර

එපා අමතක කරන්නට ගියත් දුරු        කතර​

ඔබෙ සිනා පොදක තෙතමනය නැති මානයේ

ලොබ බඳිමි උණුහුමට​ මියුරු       ගිම්හානයේ

මුදු සුවඳ දැවටෙනා ඇස ගැටෙන      මානයේ

රෝස මල් යායක්ම පිපුණි          සන්තානයේ

අතින් අත පටලාන​ ඇවිද   ගිය​ ​     සන්දියේ       

නෙතින් නෙත කළතාන​ කිමිඳ ඉඳුනිල්දියේ

අහම්බෙන් හමුව වෙන්වුණ සිහින අඩවියේ

යළිත් හැකිනම් ඉන්න  කිඳුරු පාසල්  වියේ

මල්ලිකා එම්. බණ්ඩාර

18.03. 2017