ශුද්ධවූ ලියවිල්ල

අත හලෙමි දෙරණ මත ශුද්ධවූ ලියවිල්ල

අපුල මිස​, ශුද්ධවූ යමක් එහි නොවූයෙන් 

වෛරයේ ක්‍රෝධයේ ලේ තරල තැවරිලා

පෙඟී ගිය පිටු අතර කැටිගැසී

මොරගසන අඳෝනා ඉකිබිඳුම්,

දෝංකාරය මිසක, දෙවි කෙනෙකු නොදිටියෙන් 

යුධ බියෙන් පලායන​ මිනිසුන්ගෙ

ළයට තුරුළුව හිඳින දරු පැටව්

සාපිපාසෙන් නඟන කෙඳිරිල්ල​

තියුණු සැතකට වඩා මුවහත්ව​

කකියවයි හද මඬළ සිදුරු කර​

ජාතිවාදයේ අත්පොත ලියා

දතට දත ඇසට ඇස​ නියතියෙන්

හුදී ජන හදවතේ පහන් සංවේගයෙන්

වපුල බිජුවට වලින් විපුල​ අස්වනු නෙළන

කාලයේ කතාවයි මේ 

පරපුරෙන් පරපුරට​ ඇසෙන්නේ

බිම්කඩට පොර බදන​ මිනිස්කම​ පොලුගසන​

සත්ව සංහාරයේ වන පෙතක​

වැයෙන රණ බෙර ලයට

රණ ගීත ගයා මියදෙනු මිසක​​

මනුෂ්‍යත්වයට එරෙහිව යදින

යාතිකා පද අතර දුටුවාද 
විමුක්තිය​ යම් කෙනෙක්?

මල්ලිකා එම් බණ්ඩාර

21. 02. 2018