ගඟට අමතක උල්පත​

මාව​ හැර ගිය නුඹව සොයාගෙන

ගව් ගණන් දුර මඟ ගෙවාගෙන​

ගම් නියම් ගම් බිම් දොවාගෙන

ඇදෙමි දිගු ගමනේ එක හිත දරාගෙන​

බිඳුණු කැළඹුණු හිත් දනව්වේ

සිඳුණු සෙනෙහස නැත රැඳෙව්වේ

රිදුණු පෑරුණු නෙත් කොදෙව්වේ

මතක සුවඳය මා රිදෙව්වේ

මිණි කිකිණි රන්රසු සලා ගෙන​

නිනද දී මඳ නල හමා යන​

ප්‍රේමයේ කෙම් බිම දකින්නට​

වැලිකතර වුව එමි සොයාගෙන​

ගඟට අමතක වුවද උල්පත​

ඉවුරු දෑලම දනී වත ගොත​ 

වැලිතලා යට ඇති පුරාවත​

ගීතයක්වී ගැයෙයි හදවත​ ​​

මල්ලිකා එම් බණ්ඩාර​

19. 08. 2018