සත් වග දිනේවා!

ලුම්බිණි සාලවනේ මඳ පවනේ ​ ​

සුවහස් මල් සුවඳින් පිරුණේ

කම්පිත කරවා සහසක් ලෝදා

සත් පියුමන් මිහිමත පිපුණේ

​​

මිහිතලයම දොවා කර ඒකාලෝක​

පුර සඳ මෝදු වන පසළොස්වක දාක​

මොහඳුර මැද සසර දුක වළඳන නේක​

 සව් සත නිවන්නට බුදු බව ලද​ සේක​

ගහකොළ අතු පතර සිහිළස සළායේ

සත්සිත් පහන් කර මෙත් සුව වෙළායේ

සිත්පිත් නොමැති බෝපත් සර තළායේ

මිහිමත​ කිතු ගොසින් තුති ගී ගලායේ

සමිඳුන් අසමසම සම්බුදු පදවි ලැබ​

මෙත් ගංඟා ගැලූ අද වැනි දිනක සුබ

සිත් මල් දොවාලන​ තෙමඟුල් අසිරි මැද

සත් වග දිනේවා සදහම් පහස ලද​

මල්ලිකා එම් බණ්ඩාර​

18. 05. 2019