විනිශ්චය​

සිප වැළඳ හිඳි මිනිස් වග සිනා කැරැළි  මැද​

තනිවෙලා  කඳුළු සුසුමන් අතර ඇදිලි බැඳ​  

සොබාදම එරෙහි වී බිඳ දමන පිණිස ඔද​    

හුදකලා කර තිබේ වින කරපු අපව අද​ ​

කිට්ටු වෙන්නට හෙමින් ගෙයින් ගෙට ගිහිල්ලා

තට්ටු කරනවත් ඇති දොරකඩට ඇවිල්ලා

හෙට්ටු නොකරම දෙන්ට ඇත​ කිරුළ ගෙනල්ලා

මට්ටු වෙන්නට එපා නොනගතේ ගිහිල්ලා 

ලෝක නීතියට දණ නොනැමු අපෙ වාහෙලා
ජාති ආගම් පන්ති කුල  අතර මැදි වෙලා 
අබටකුත් නැතිව ආ උඩඟු හිත් ඉදිමිලා 

එකිනෙකා වෙන්වුණේ මමායන්තරවෙලා

  

මරණයේ සෙවැනැල්ල කල් බලා පැමිණිලා

සන් කරන හඬින් මුළු ලෝතලය  කැළඹිලා

ඇන කොටා ගත් උන්ම බියපත්ව ගුලිවෙලා

අදිසි සතුරෙකු අසල​ හිඳී  අසරණ වෙලා

සසලවුණ කඳු මුදුන් බිම වැටී     සමතලා   

උස් පහ​ත් තැන් නැතිව​ ගලා යයි දියවෙලා

ධන නිධන හැම හිඳී පුලන්නට  පේවෙලා 

සාගින්න තුලාවේ හරි මැදට​  ළං වෙලා 

සතා සීපාවාට​ උන්ගෙ බිම්         හිමිවෙලා 
පෙම් කෙළිති ගම් දනව් මායිමට ඇවිදලා

කර දියේ නිම් වළලු නොදැන හිඳ සැඟවිලා

ගෝණ මුව රෑන ​ දිය​ කෙළිති රැළි   පාගලා

මල්ලිකා එම් බණ්ඩාර​

14. 04. 2020