සන්නාලියගේ තීන්දුව​

අතේ පිච්චිය නැතුව​

ඇවිල්ලා සෙයිලමට​

මැෂින් කටු පෑගුවේ

අපේ නැති බැරිකමට

තොග ගණන් හීන කඳු

නැඟී අහසක් උසට

අටෝරාවක් පැතුම්

තිබුණි අපටත් එමට​​

දහසින් බැඳි පියළි

එක්ක ගොඩ මඩ යාව​

නැතිකමට​ ​දිවා රෑ

දුෂ්කර ක්‍රියාවෙන්

පැක්ටරියෙ ජීවිතය 

විකුණුනේ සිල්ලරට​

ඇමති රජ දරුවන්ට​

යස ඉසුරු ගලනවා ​

වැහි අකුණු වසංගත 

අපෙ හිසට එළනවා

කොරෝනා රැල්ල පෑගිලා

ඇඟලුම් හලට​

කැකිල්ලේ තීන්දුව​   

ඇවිත් ගේ දොරකඩට​

‘රිසවේසමේ’ කොනක 

ලහක වපසරිය ඇති 

බූදලේ අටෝගත්

අපේ ටකරන් මැදුර 

රාජසන්තක වෙන්ට

'ඇස්කිරිසි' ගහනදා

මමත් ‘අර ඇතින්නක්’ කළහාම

​මගේ කිරිදරු කැළත 

ගෙනැල්ලා දානාවා සහතිකයි 

ආරාම දොරකඩට​. 

මල්ලිකා එම් බණ්ඩාර​

21. 10. 2020