බෙත්ලෙහෙම් උදානය​

පිපී ලෙළදෙන සුවඳ කුසුමක

හැපී එන මඳ නල පොදින්

ගොපලූ ගීයක ළපටි දෙතොලක​

සිනාවක්සේ මුදු නදින්

නිවා සනසන පිණිස සරතැස​

දියත්තක්වී මිහි බඳින්

නිවත්දන සිත් දොවාලූයෙන්

බෙත්ලෙහෙම් පුරවර මැදින්

අතරමංවී  සරණ පතනා

දිවි කතර දුක වළඳමින්

මිනිස් වග සුවපත් කරන්නට​

ගඟක්සේ ගලනා හදින්   

සාමයේ අරුණළු විදාහළ​

අවිදු ගනඳුරු වන රොදින්   

ප්‍රේමයේ සත්සර වයන්නට​ ​

සමිඳ හද අඹරට වඩින්

මල්ලිකා එම් බණ්ඩාර​

25. 12, 2017