අබිනික්මන්

​බැන්ද සුළඟිළි සිහින් හුපට​

කුරිරුවී යදමක්ව​  මෙතරම් 

අපාගතවන  බව නොදත්තෙමි 

පලය වී ප්‍රේමයේ මනරම්

එපාවන තුරු බැඳුන කුලගෙය​

සිහිනයක්වී රැය පුරාවට​

සපා කෑවේ මගේ හදවත​

කීතු කීතුව ඉරා යන්නට​

මැකී අඩසඳ අඳුරු රෑ මැද​

වැළඳ ගෙන ජීවිතය ළමැදට​

රැඳෙමි  රාහුල කුමරු හින්දා

හොවා මියැදුන මතක පොදි මැද​

සෙනෙහසම යෙහෙකැයි පැතූ මුත්

සොයා ආවා නොවෙයි රජ සැප 

රැහැට එරෙහිව පලා ආයෙන් ​

කෙලෙස අබිනික්මන් කරන්නද?

භද්‍ර යෞවනයේ පිරූ පෙම් 

ක්‍ෂුද්‍ර වීනම් පාරමී දම් 

භද්ද කච්චායනා වෙන්නට​  

ඉඳ්‍රඛීලය සේ හිඳින්නම්!

මල්ලිකා එම් බණ්ඩාර​

11.11.2020