කලියුගේ

May 5th 2022

දින සති මස් ගෙවුණි දරුවන් මඟට වෙලා

ඉත්තෑවෝ ගුලට අණසක පතුරවලා

ගිනිගත් රට නිවන මංපෙත් ඉවත හෙලා

ඌරෝ මඩ තළති ගාලට එකතුවෙලා

 

අටුකොටු හින්දුවෙන් පාලක හොරදෙටුවෝ

සාධාරණය ඉල්ලති පුරවැසි දරුවෝ

උන්හට​ ගිනි බිඳිති අවිගත් නිලදරුවෝ

ලේ රස විඳිති රට කරනා අම්බරුවෝ

 

කන බොන යනෙන හැම දේටම දුනු විද්ද​

පාලක පැළැන්තිය රටටම දුන් සුද්ද​

යහතින් මැදුරු වල නිදි, නැතුවම සද්ද​

ලඟදිම ගහයි අපෙ ඇඳි වතටත් බද්ද​

 

මල්ලිකා එම් බණ්ඩාර​

23. 04. 2022

  

රන්තාලිය වැව් දිය

 

සඳත් නැවතිලා සඳවත එබෙයි හිනහිලා

නීල නෙතු දැළේ මා නෙතු සඟළ දැවටිලා

වළාරොදක් වී පවනේ ඇදෙන හුදකලා

මගේ හිත අරන් මැණිකේ ගිහින් පියඹලා

 

ගිනි පුළිඟු විදින​ මද්දහනේ ඇතුගල මුදුනේ

රන්තාලිය වැව් දිය මත මුදු රළ බිඳුනේ

නුඹේ සිනා තඹර කැකුළු සුවඳයි රැඳුනේ

පිදූ කුසුම් මැළවුණාද වැව් තෙර අයිනේ

 

වත් හිමි බණ්ඩාර දෙවොල පඬුරක් පුදලා

කොච්චර යාදිනි කීවද නුඹ ගැන හිතලා

උත්තරයක් නොදී යන්ට ගම රට ඇරලා

සත්තයි හීනෙන්වත් නෑ වරදක් කරලා

 

මල්ලිකා එම් බණ්ඩාර​

22.05.2023

කියග මඟිය තා...

 

කියග මඟිය තා... 

 අවුරා රැඳුණෙ මංපෙතා

 සොමි සඳ කිරණයුරු නෙතා

පැහැර ගෙන මහද විජිතය

  පතුරා අණසක දිගතා

 

තුමුල බලැති උර මඬළේ

උණුහුම සිහිළස රැඳුනේ

නිමල තෙදැති නෙතු සඟළේ

මල් හී සර වැද බැඳුනේ

 

කියග මඟිය තා... 

මෝදුවුණ යොවුන් උයනත​

පෙමක මහිම මිහිදන් කර​

කොයිබ සිට ඇවිත් කොයිබට

ගියෙද කියව තා...

 

අඳුරු ගැබේ ගිරි අරණේ

හද ලෙන දැල්වූ පහනේ

එකම පැතුම දල්වාලූ

රන් සිළ කෙලෙසද නිවුනේ

 කියග මඟිය තා...

මල්ලිකා එම් බණ්ඩාර​

22.05. 2023

දේවතාවිය මා...

 

අල්තාරයේ හිඳුවාලා

 සුදු සඳුන් දියරෙන් දෝවා

සුවඳ ධූපයෙන්  පුෂ්ප දාමයෙන්

ප්‍රදීප ජාලා දල්වාලා

වන්දනාමානයෙන් පුද ලද​

දේවතාවිය මා...

 

ඇදිලි බැඳගෙන යැද්ද යාදිනි

මතකයේ නොරැඳිනිද​ සාමිනි

ඉන්ද්‍ර චාපෙන් බින්ද​ හී-සර​

දෑත් හැඳි සිඳ බිඳ දමන ලද​ ​

 දේවතාවිය මා… 

ප්‍රේමයේ නාමෙන් තැනූ 

රන් දෙවොල ගිනිලා 

විමන් දොර හිඳ - කියා නව නින්දා

ද්වේශයෙන් පිටමං  කරන ලද​ ​

දේවතාවිය මා...

දොරින් දොර ගම් නියම්ගම් මැද​

ප්‍රේමයේ ගිනි සිළුව අතැතිව​

 භවෙන් භවයේ නුඹම සොයනා

දේවතාවිය  මා...

 

මල්ලිකා එම් බණ්ඩාර​

19. 05. 2023

අම්මා

 ලියා නිම කළ නොහෙන කවියක්

ගයා නිම කළ නොහෙන ගීයක්

වෙලා ගත් හද සුවඳ තලියක්

මියෙන තෙක් සිත නිවන දැහැනක්

සිනා කඳුළැල් මැදත් දැල්වෙන  

දොළොස් මහ ​ පහනක්ය​ ලියළන 

 ගිරිදඹේ නැග ඉසිඹුලන්නට  ​ 

 වරම් දෙන්  අම්මේ, 

මල්ලිකා එම් බණ්ඩාර​

15.05. 2023

උරුමය

තරු මල් මියැද ගිළිහෙන මැදියම් රැයක​

අරුමය දැනේ මාතින් ගිළිහුණ පෙමක​

තුරු මත පතිත වෙන පිනි කඳුළලැලි විල​ක​

තරුපති වුණේ කිම නුඹ​ නොපැතූ දිනක​

 

කාලය තනා දුන් ගී තණුවක පහස

මා ළය පිරිතිරුණි​​ පුන්කළසක් විලස​

කෝලය​ මැවූ නෙතු අග  සැඟවුණ​ රහස​​

 ආලය නොවේ යැයි පවසන්නේ කෙලෙස​?

සිහිනෙක​ සුවඳ ඉහිරී ගිය දසන්තයේ

කඳවුරු බැඳ හිඳී මතකය දිගන්තයේ

වියමන මඟ ඇරී තනිවුණ​ අනන්තයේ

පාළුවෙ සළුව උරුමයටද තියා ගියේ?

​

මල්ලිකා එම් බණ්ඩාර​

9. 05. 2023