කාලේන ධම්ම සවණං

  

සුදු වැලිතල මත වියළී ගිළිහුණ 

බෝපත් අමදින බෝමළුවේ  

හිරු නැඟ මියැදෙන දවසක කෙලවර​

පින් පල ගැනමයි හිත වෙළුවේ

කෙළෙසින් පිරි සිත​ නිකසළ​ වෙන්නට​

​රාදොස් මොහඳුර දුරු කළයුතු වග​

නොදෙසූ යතිවරු, වැලිකැට ගානට

පිං පිරෙනා හැටිමය දෙසුවේ

රා ගිනි මොළවන රත්වන මත්වන

සිතිවිලි සින්දන මඟ හමුවේ  

කම්සැප උදෙසා පින්පුරනා හැටි 

පමණකි අසපුවෙ බණ දෙසුනේ​

ගොරතර සසරේ නොනැවත​ ඇවිදින​

මියැදෙන ඉපදෙන බවදුක වළඳන​ 

කෙලෙසක කවදා නිමක් දකින්නද​ 

වල්මත්වූ මේ දිවි කතරේ?

මල්ලිකා එම් බණ්ඩාර​

4. 09. 2013

සඳවතී

 

සඳට රන් තාරකා 

සදිසි කිරි දරුවනේ

එනතුරා - මඟ බලා

ඉන්නවා මා අදත්

මා අදත් ඉන්නවා

සිනා යායක් මවා

කියන හුරතල් කතා

ඇහෙන දකිනා වෙලේ

දැනෙන මිහිරක් තරම්  

කොයිද සැපතක් ඉතිං

සීත පවනේ එතී 

දැනෙන සුවඳක් වගේ  

දැවැටියන් මා වටේ 

සිඟිති දරු පැටවුනේ

සම්පතක් නෑ ඒ තරම්

මල්ලිකා එම් බණ්ඩාර​

7. 7. 2023

නොමළ ප්‍රේමයක්

 

උත්තරීතර ප්‍රේමයක සුව​

විඳින්නට දුටු සිහින අපමණ

කඩ බිඳ දැමුවේද රහසින්​

අසපුවේ මල් අතුල පුදසුන​

 

අන්ධකාරෙක දෑස් නෑරම

වරක් පමණක් ඇන්ද සිතුවම්

කොතැන කවදා නමුදු දවසක

කාලයේ ගණ වැලිතලා යට

 

නොමළ මුත් මිහිදන් කරන ලද​

යළිත් දළුලා එතැයි නොසිතූ

අති සොඳුරුවූ ප්‍රේමයක් 

අහේතුක වරදකට සිරගත වෙලා

සදාතනිකව විඳින දඬුවම්

 

මල්ලිකා එම් බණ්ඩාර​

5..05. 2023

මෙරුවෝ

සැඟව ගිනි පුළිඟුවකක් විලසින්

රැඳී අළු පාදමක නොනිමී

ගිනි පිඹින්නෙකු එළඹෙනා තුරු

මොළවනා තුරු යවටසේ ගිනියම්

උදාසීනව මළානිකවී බලා හිටියා

යොවුන් වසතද ගෙවී යන සඳ​

 

මඳ පවන් වැද දෑස් විවරව​

යළි යළිත් තද කර වසා ගෙන​

රකුසු හඬ කණ නොවැකෙනාසේ

වසන්තය විත් නික්ම යනතුරු

විරාගික වූයෙම්.

 

සරාගික​ හඬ සවණ පතිතව

පියාපත් සළනා ඉසව්වේ

උකුසු කුරුමානට හසුවී

අළු තරලයෙන් නිරාවරණිත​

සිහින් ගිනිසිළු පවන්ගතවී ​

ගිනි පුළිඟු මෙළවුණා අහසට​

 

රාග ගිනි කඳ මහෝගයවී

මෝහයෙන් ගත සිත සළිතවිය​

කෙළෙස් බර සිත දැවී හළුවිය

ගම් දනව් ගොඩ බිම ඉහිල්විය

ගිනි නිවී ගත සිත සිහිල් විය​

 

පුළුන් රොදකට උරුම ඉරණම​

අත්විඳින්නට වීද කරුමෙට​?

දෑත දෙපයට වට විලංගුව

වහල් බැම්මක අරුම උරුමය

අදිසි ගින්නෙන් දැවුණ සියොළඟ

සිපිරි ගෙයතුළ ඉබේ හිරවිය​

කටුක ද්වේෂය සිත ඉතුරුවිය​

සසර මංපෙත් එළිපෙහෙළිවිය​​

 

මල්ලිකා එම් බණ් ඩාර

15. 08. 2023

 

නැවත්ම​

මතවාදයක සිරගත කළ මිනිසුන්ට 

ඇවැසිව ඇතත් නිදහස් සුව වළඳන්නට​

නිදහස තකා කෑමොරදෙන මිනිසුන්ට​

පාලක බමුණු කැළ දෙති හිරබත් කන්ට​

ආගම නොවෙයි දහමට මුල් තැන දීලා

ජාතිය නෙවෙයි මිනිසත්කම නංවාලා

සුඛවිහරණය උදෙසා දන රවටාලා

පව් කඳු වැජඹේය ජය දද නංවාලා

යුදගිනි පුපුරු පිඹ ගිනිදැල් මොළවාලා

සහජීවනය අතුගා දන  කළඹාලා​

දුසිරිත කුරිරුකම රජවෙන්නට දීලා

නියරත් වැටත් නිහඬය ගොයමත් කාලා

දන් පින් දෙසන නිවනේ මඟ අවුරාලා

දෙව්පුර කම්සුවය වෙනුවෙන් දිරිදීලා

පුදපෙත් පැතුම් යාදිනි වල දවටාලා

යතිවරු වෙසෙති වත උගසට විකුණාලා 

තැළුණේ පොඩිවුණේ තම පන්තියම බව​

කාරණ කිම නොවැටහෙන පන්තියට ගව​

යදමින් බැඳී කඹුරන්ටම කරපු පව​​

සති අසතියෙන් හිඳ නිමවමු ගමන භව​

මල්ලිකා එම් බණ්ඩාර​

9.10. 2023