ඕක් ගහෙන් සමු ගනිමි

සඳ පහණ දියවෙලා මිහිමතට ගලන සඳ​

කවුළු දොර පෙම්කෙළින ළහිරු කෙඳි අඳුර බිඳ​

තරු කැකුළු පිපෙන මැදිය මෙත් සිටි පසෙක හිඳ​

අවසරයි සමු ගන්න සෙනෙහසින් ඇඳිළි බැඳ​

 

මඳ සුළඟ හා සමඟ සිනා වේ සිළි සිළිය

කඳුළු පිනි කැට සළිත අතුපතර දොඩමළුය​

හුදකලා ඕවිල්ල නුඹට තනි රකිනු ඇති

නුහුරු නුපුරුදු මුහුණු හෙට දිනේ වඩිනු ඇති

 

නිහඬ සිතිජය ඉමේ හිරු ගිළෙන සැඳෑවක

නිළඹ වෙරළේ හැපෙන දුර ඈත ඉසව්වක​

නුහුරු මුත් සෙනෙහසින් වැළඳ නව දනව්වක

කෙම් බිමක් සොයා යමි ඉසිඹුලන්නට දිනක

 

දූ පුතුන් ගේ මතක එකමිටක මොළවාන

නික්ම යමි නිහඬවම එහෙත් සිත සසළාන

සැඳෑ සමයට උරුම මතක පොත පෙරලාන​

යන්න මට අවසරයි තෙත දෙනෙත වියළාන​

 

මල්ලිකා එම් බණ්ඩාර​

24.02. 2025