ජාත්‍යන්තර​ කාන්තා දින සැමරුම් පණිවිඩය​

මිහි මඬල පය ගසා මිනිස්වග නොම හැඳින​

නොදුටු දෙවියන් යදින මිනිසුනේ

හද මැදුර වැඩහිඳින දෙවි දේවතා ගණා ​

අවදි කර මොහොතකට ​දයාදර වෙයල්ලා 
විසකුරු සපුන් මවන ශුද්ධලියවිලි ඉරා

ගිනි තපින කල ඉතින් ඇවිල්ලා

ලියන්නන් කුරුටු ගෑ මිත්ගොන්න​

මහ පොළෝ උරුමයට​ යාකරන​ ​

කේවට්ටයින් ගොතන​ ගජබින්න​  

දැයක ඉතිහාසයයි තලුමරන​ නුඹලාම 
එළඹ සිටි සිහි ඇතිව හිඳිල්ලා

කාමභෝගී සුරා සොඬ අමන

රජ-කුමර මැති ඇමති රැල

ස්වේතාම්බරපටෙන් විළි වසන​

සල්ලාල ​පැළන්තියෙ 
කිළිටි සළු පිළි දොවන​ 
දිළින්දෝ වහල් බැම්මෙන් වෙළා

ව​න්දනා මාන පුද පෙත් ලබන​ ​  

කළියුගය මෙයයි දැන ගනිල්ලා ​

 භක්තියේ කඩතුරාවෙන් ණැනස වසාගත්

මිනිස් පරපුර නිවට නියාළුව ගියසේය​ 

අළු දූළියෙන් උපන් වග වලස් ගොර සපුනි

එක මිනිස් වගක් සේ  බැඳෙල්ලා

හද මැදුර වැඩහිඳින දෙවි-දේවතා ගණා ​

අවදි කර දයාදර වෙයල්ලා

නුඹලාගෙ ආත්මය සුවඳ පවනක් වෙලා

විශ්වයට හැරී ​ යන මොහොත පැමිණෙන තුරා

ලේ මාපිළුන් නොවී ඉඳිල්ලා​

නයි-පොලොන් විස පිරුණු 
ළය මඬල හොවාගෙන​ 

නුඹලාම වදන ලද​ පුතුන්හට​
මිනිස් සනුහරේ වනසනු පිණිස

කිරි පෙවූ ගැහැණුනි,
එරෙහිවී දිළිඳුකම සාදුකට​
පොවාපල්ලා උතුරු මිනිස්කම 
අනාගත පරපුරට

කිළිටි පූජක රැලට දණනමා 
ස්වකැමැත්තෙන් විලංගුව පැළඳි

අඳබාල ගැහැණුනි,
සදෙව් ලොව දකිනුවස් ​හූල්ලා 

අපා දුක් විඳ මෙහිම​ දැවී අළු වෙනු මිසක​

"කාන්තා දිනය​" සමරනු තබා

මනුසතෙක් වදන්ට බැරි තොපට​

තවත් කප් සුවහසක් මේ නිරේ පැසෙනු හැර​

සුගතියක් නොවන්නෙන්

පුළුටු ගඳ ඉව නොකර මඟ දිගට​

පාප කැළි කුණු කසළ මුදා හැර​  
මිනිස්කම කිරට හරවනු පිණිස 

ඉතින්වත් වරෙල්ලා පෙරමුණට​

මල්ලිකා එම් බණ්ඩාර​

8. 03. 2018