සිපිරිගෙය​

පොසොන් සඳ මෝදු වෙන ඉසව්වේ

අවිදු මඩ වගුර​ වැද කෙළින​ වනචාරීන්ට

ණැනස පාදන පිණිස​

ගොහොරු බිම​ පින්කෙතක් කරනුවස් ​

මිහිතලය දොවාගෙන​

කුළුණුබර මිහිඳු සඳ

උදාවූ සේක​ සිත් නිවාලන​

පුරුෂෝත්තම ඇසින්

ලිංගිකත්වයේ කොටු පවුර තුළ​ බැඳ දමා

ගැහැණු වට කර තැනුව

සංස්කෘතික සිපිරිගෙයි 
වැට කඩොළු බිඳිනු වස්

කාන්තා නිදහසට මුල් ගල තිව්ව 

බෝ සමිඳු වැඩම්මූ

සංගමිත්තාතුමූ ඉතිරියකි

දළදාව වැඩම්මූ  හේමමාලාතුමූ

ඔබද අභීතවු ඉතිරියකි

​

එදා සිට මෙදාතුර කාන්තා හිංසනය​

නීතිගත කරන්නට

කුළුහරක් ගාල වැද​

හිවල් වත රැකගන්ට

ගෙලේ රන්හුය බැන්ද බොහොඬුන්ට

දියවන්නාව බොර කරන මීමුන්ට​

මව් පදවි දුන්නෙත් ගැහැණුන්‍ ය​.

එවන් මව් පදවියට නිගාදී

නැති එකාගේම ඉහමොළ කකා

ඇති එකා යෙහෙන් වැජඹෙන පිණිස​

රජුන් මැති ඇමැතියන් බිහිකරන

මුග්ධ​ දන මන දොවා, අවිදු මළ හරනා

මඟ කියා දුන මැනව​

බුදු සාමිනේ, ජේසුනේ-

අල්ලාහු අක්බර්, එලෝහිම්

ලෝක පාලන දෙවිසුවාමිනේ!

මල්ලිකා එම් බණ්ඩාර​

25. 03. 2019