මියුරු සිහිනයක් ​

පොල් කරටි සොලවා

සිරි සිරි හඬින් නළවා

ගීතයක්සේ මිමිනෙන​

හිමිදිරි මඳ සුළඟ

අඩවන් කවුළුවෙන්

ගලා එනවිට ​කුටියට​

දැනෙයි අපමණ සතුටක්!

හිරු සයනයෙන් නැඟී

නිදිගැට හරින කණිසමේ

සපු පුවඟු මල් සුවඳින්

නැහැපුඩු පිරීගිය​

බාල කාලය දකිමි මනසින්

ගල්ලෑලි පළිහට​

ගල්කූරු ආයුධය​ ගැටගසා

පිනි අතුල ළතණපත්

විල්ලූද බුමුතුරුණු මත​

අකුරට ගිය ගමන​

මෙනෙහි වෙයි මියුරු සිහිනයක් වී

මල්ලිකා  එම්  බණ්ඩාර​

23. 08. 2017