ගාලුමුවදොර තැළෙන තණපත්
ගැනත් දුක්ගී ලියවෙනා
දොරින් දොර කිරි බිඳට හඬනා
ළදරු හඬ කණ නොවැකෙනා
ගව් ගණන් දුර පෝලිමේ දිග
දකින ඇස් ගෙඩි අඳ වෙනා
දෙකොණ ගිනිගත් පන්දමේ අග
රටත් රැටියොත් දැවටෙනා
ජාතියේ මහ රාජානෝ යළි
සළුව කැස පට කවනවා
උන්ගෙ ගැත්තන් මකුළු දැල් පිස
කිරීටය ඔප දමනවා
තවත් සැරයක් වන්දනාවේ
යන්ට වහලුන් හදනවා
අයනු ආයනු නොදත් දරුවන්
ගෙදර හිරකර තියනවා
ටිකක් කරදඬු ඇදී එනකොට
වහල් මෙහෙයට යවනවා.
නාකි බල්ලන් පෙරහැරේ ගොස්
අම්බලම තුළ ලගිනවා
අළුත් ලෝකය නොදත් කමටම
තරුණ උන්ටම බනිනවා
කාසි වැස්සේ ගඟුල මැද හිඳ
සියළු යසිසුරු විඳිනවා
ව්‍යවස්ථා කඩමල්ල අඹරා
තෝන් ලණුවක් දමනවා
කාසි පොදියේ බරට සරියට
බලය දෙපසට කිරනවා
ඇතොර මුරකාවල් යොදන්නට
සෙබළ ගණ කර අඹනවා
අයෙත් අර හිරගෙවල තපිනා
උන්ට බැන අඬගසාපන්
යාන්තං ඇද ඇරුණ කොඳු ඇට
සදහටම බිඳ දමාපන්!
මල්ලිකා එම් බණ්ඩාර
19. 08. 2022
