කන්දඋඩ දේසනාව​

සුදුපිරියම් කරපු සොහොන් කොත් හා සදිසි

නුඹලාගෙ ගැල්වුම්කාරයෝ

රොතුබුරුතු පිටින් එයි ගෙයින් ගෙට​,

උපන් ගෙයි (original sin) පව් කමා කරන්නට​

කුණු කන්ද ​පාමුලේ නිවස්නා පිංවතුනි-

තෙල බලව් පෙළහර!​

දියවන්නාවෙ දිය මතින් ඇවිදගෙන

කුණු කන්ද මුදුනට ඇවිත්

"දිළින්ඳෝ ආශිර්වාද ලද්දෝයි"

දේසනා කරනු ඇති උඹලාට 

අදහන්ට එපා උන්!

ජීවත් වෙයල්ලා  අද, හිතට එකඟව,

 "හෙට දවස”  තවත් දවසක්ව​

 නුඹලාව සොයාගෙන​ එන තෙක්

සුදු වතින් සැරැහී විලිස්සා

දත් බොල්ලෑව පෙන්නා 

පොළොන් විස ළය පතුළ සඟවාන

​කුණුවුණ ආත්මයෙ දුගඳ නුඹලාට දැනෙතියි

සුවඳ පැන් සොළොස් කළයෙන්

දොවා පව් පස්කන්ද,​

අන්තීම බිංදුවත් හිඳෙන තෙක්

උරා බොනු ඇත රුහිරු නුඹලාගෙ

හිරිකිතක් නැතුව හිත අහලක​.

දෙඤ්ඤං කාසිපොදි වලට පීචං වෙලා

රැවටෙන්ට නම් එපා මේසැරේ

හිටිකෙලින් තියාගෙන වකුටු කොඳු ඇට රෑන​

ඉද්ද ගැහුවා වගේ නැඟිටපල්ලා

උරෙන් උර එක පෙළක​ එකම අරමුණක හිඳ

වහල් බැමි පුපුරුවා සොයාපල්ලා 
නුඹලාගෙ “නිදහස”​

කුණු කඳු වැනි උන්ට පාවාඩ අතුරන​​, 
කුණුවෙච්ච දේහය​ පල්ලැක්කියේ වඩම්මන

පරපුරෙන් උරුම වුණ ​වැඩවසම් චින්තනයෙ​

රැහැන් පට දෙදරවා ස්වෛරී මිනිසුන් වෙයල්ලා

​කුණු කදු ඉවත්කර නුඹලාගෙ හිස් වල
මිනිසාගේ ස්වාමියා මිනිසාම බව,

නුඹලාම අදහාගනිල්ලා!

මල්ලිකා එම්. බණ්ඩාර​

16. 04. 2017.