ගමනාන්තය​

මිදෙල්ල මල් රේණු හැලෙන

හිමිදිරියේ වෙල් එළියේ

මහ නියරේ අතුරා ඇති

මල් පෙති බුමුතුරුණ මතින්

බාල වියේ අපි දෙන්නා 
පිණිපොද වැස්සට තෙමුණා

විහඟ ගීත ගලා හැලෙන​

හිරිකඩ වැහි නිබඳ වහින

මල් පිබිදෙන සරසවියේ

සදාහරිත වියන​ යටින්
යොවුන් වියේ අපි දෙන්නා

හිරිමල් වැස්සට තෙමුණා

සුවිසල් පහ මැදුරු සිඹින

සුළං පොදක දැවටීගෙන​

ලතා මඬුළු සෙවැනැල්ලේ

අමයුරු පෙම් රහස් කියන​

කොබෙයි යුවළ සේ උන්නා

පෙර දවසක අපි දෙන්නා

වියළුන මේපල් පත් මත​

හීතල හිම කැට ඉහිරෙන​

කන්දෙන් කන්දට දිව යන

බැටළු පැටව් දක්කාගෙන​

ගොපළු ගීත රස වින්දෙමු

කොදෙව්වකදි අපි දෙන්නා

සේද වළා පෙළ ඇතිරුන​

නීල ගුවන දෙපළු කර​න්

ජීවිතයේ අරුණ සොයා

අනන්තයට පියාඹලා

දැන් හොඳටම වෙහෙස වෙලා ​

තොටුපොළ හැර යන කාලය

සුභ මොහොතින් ඇවිදිල්ලා

මල්ලිකා එම් බණ්ඩාර 

10. 09.2018