තුන්තිස් පැයේ නිදි මල් පරවෙන තුරුම
විය බැඳි මීදෙනක සේ සෙක්කුව අදින
නිදහස් බිමක දිනු දියණියකට පරම
උරුමය වහල් මෙහෙයද අත්වෙන නරුම ?
කඹුරන්නට ගිහින් දුරුරට සහරාවේ
කහවනු පොදි අරන් යළි ගම රට ආවේ
සැමියා අන්සතුය, දරුවෝ නොනගතය
අපෙ දහඩිය බිංදු මුන්ලට ගජ මුතුය
මුඩියක් ඇරිය පමණින් දෙව්ලොව මැව්ව
අඩියක පදම ඉහලින් සීගිරි පව්ව
ඉදිකළ සුරාහල් මඟ ගව්වෙන් ගව්ව
වඩියක් හදන උන් රජ ගෙදරට යැව්ව
ටකරං මැදුර වට ඉටිරෙදි සැරැසිලිය
පන්කොළ පැදුර ගෙයි මැද්දේ වැරැහැලිය
සොච්චම් දෙයක් ගෙන, තරකර දෙන මඩිය
අපෙ උන්ගේ සිරස යටිකුරු කළගෙඩිය
පීදෙන කැකුළු මල්වැනි දූවරු පුත්තු
බේබදු සළෙලු දන මඟ රැක බිලි ගත්තු
මුනිවත රකිති කස අතැතිව බලවත්‍තු
කතිරෙට සුදුස්සෝ හොයපන් බවලත්තු!
දෙස රැස උලාකා හපකර කළ හරිය
ඇහුණත් රෑ දවල් පෙනුණත් නැත විරිය
ඉහ මොළ ඇති උගත් කැළටත් ඇති දිරිය
ආපහු හැරෙන්නට දැන් කාලය හරිය!
මතු පරපුරට ආඩම්බර විය යුතුව
සහජීවනය ජාතික සමඟිය පැතුව
අත්වැල් බැඳ ගනිමු අපි හැම එකමුතුව
මල්ලිකා එම් බණ්ඩාර
27. 07. 2020
No comments:
Post a Comment