මගෙ ටිකිරි බිසෝසඳ​

මැටි කොතලේ උකුලෙ තියන්           

පැනට වඩින බිසෝ නුඹය

ගොම පිරිබඩ ගෑ ගෙපලේ

මගේ කුමරිකා නුඹය​

රජෙකුට අගමෙහෙසි වෙන්න

උපන් බිසෝ තුමූ නුඹය​

මැටි කබලේ රොටී හදා

ලුණුමිරිසක් පතට බෙදා

කුසේ සුදා  ගිනි නිවන්න​

රජබොජුනක් සේ දැනෙන්න​

පෙරුම් පුරා බලා ඉඳන්

වළඳන්නට ගෙනත් දෙන්න​​

නුඹ අහසයි මම පොළොවයි

පල දරනා සරු සාරෙට​

ඒ පොළොවේ අස්සද්දා

පූදින රත් හැල් යායට​

මගෙ උකුලේ වැඩුන ළකල​

ටිකිරි බිසෝ සඳ නුඹමය​

සඳ හිරු තරු පොකුරු අතර

අහස් නිල්ල හා යාකොට​

අඳිමි රිදී රේකාවක්

සිතිජ ඉමෙන් පිය මනින්න​ 

අද හෙට මෙන් සදාතනික
​කල්ප කාල වෙන්කරනා

මඟ තොට​ නැති හිස් අහසට

කාලයේ රේකාව නුඹය  

මල්ලිකා එම්. බණ්ඩාර​

 19. 07.2017