ඉර එළිය

එකම ඉර මඬල යට​

අසිරිමත් මිහි මඬල උරුම අපි

වැට-කොටු ගසාගෙන
​ජාති ආගම්,කුල-මල වටකර 

සැහැසි ලෙස බිඳ දමා මිනිස් දම්  
තළා පොඩිකර දමා පිවිතුරු සබැඳිකම්

ලේබල් ගසාගෙන ශුද්ධවන්තයින්සේ;

පෙලක් අය ස්වාමින්ය​. තව පෙලක් දාසයෝ

තවත් අය පියවරුය, මව්වරුය​

ඔවුන් පා දොවන අපි ​පව්කාර මිනිසුන්ය​.

මිනිස් දහදිය කඳුළු අනා පිරියම් කෙරූ
පන්සලේ පල්ලියේ කෝවිලේ අසරණව​   
අනුන් සෝදන තුරා අපේ පව්

දණ නමා ඇදිලි බැඳ​
අපි සරණ පතන්නෙමු.

අතර මැදියන් වෙලා දේවත්වයේ හිඳින​

ස්වාමිවරුණි පියවරුණි මව්වරුණි;

අපේ ලේ සුවඳ තැවරුන කාසි හිලව්වට​
ජීවිතේ නවාතැන සාමයෙන් හිඳින්නට 
දේසනාවක් දෙසනු මැන අපව නිවන්නට​

අපේ හිත් වලට විස කටු එලා

බෙදා වෙන් නොකර කොටු-පවුරු ලා,

මඟක් ඇත්නම් කියා දුනමැනව 
"හෙල් - හෙවන්" දෙකම හැර​
​පොළොව මත පය ගසා 
ජීවිතේ විඳ ගන්න සහජීවනේ මඟක්

ජාති ආගම් වෙළඳ ලේබලය ඉවත් කර​

වැළඳ ගන්නට ළබැඳි ප්‍රේමයෙන්

එකම එක මිනිස් කුලයට උරුම

උතුම් මිනිසත් බවේ සුවඳ උකහා ගන්න 
පරණ පොත් වීසිකර පොතේ නැති
සැබෑවක් කියා දුනමැනව​​ ජීවිතය ගැන​

මල්ලිකා එම්. බණ්ඩාර​

14.10 2017