සන්නාලි සිහිනය​

ගෙයින් ගෙට ගිහින් පොඩි දැරිවි සන්දියේදිත්
මල්නෙළා දම් ගොතා ගමේ හැම මඟුලටම​

මමයි ජය මංගම් කීවෙ ගම හැම තැනම

සුදු ලේස් සාරියට​ රිදී මිරිවැඩි සඟල​

නළල් පට මාල හත​ ඇතුළු හැම අඩුවැඩිය​

සනිටුහන් කර ගතිමි කල්තියා සිහි ඇතුව​

මනාලිය වෙනදාට​ මගේ මංගල ඇඳුම 
මහනවා බෝරිච්චි අත් නැතුව​! 

යුධ​ පෙරමුණේ දෙපස කඩු කිණිසි අමොරා

සනුහරේ පෙළ ගැසී හිඳිති දුනුදිය දරා

​ධවල අස් රියෙන් අපි අරන් ගිය හංඟාන 

ජීවිතේ බේරුණා මාතලී හින්දාම
මංගලම් නැති මඟුල්දා 
හැංගුනා අපි සුසුම්ලා

මල් වෙඩිලි රතිඤ්ඤා සුදුලිලී මල් කළඹ​

ගිලිහුනා මා අතින් නොතාරිස් රාල ළඟ

හිතවතුන් ඉදිරිපිට​ තියා අත්සන පොතේ

විවාපත්වුණා අපි රහසේම​ හිතුමතේ

මනාලියක වන සිහිනය 
වියන්නටත් පෙර ලිහුණිය​

ඒවුණාට අතහැර නෑ 
මංගල සේවා සෝලිය
පෝරුව මත ඉස අසෙණිය​ 
නැකතට අන්දා සේලය​ 

හැඩ ගන්වා මලින් මුහුල​
ගෙලවට බන්දා තාලිය
​ලියන් මනාලියන් කරමි
අඟනන් දෙවඟනන් කරමි

මනාලියක් නොවුණත් මම 
කිරුළ දරන සන්නාලිය! 

මල්ලිකා එම් බණ්ඩාර​

17. 01. 2017