කන්‍යා සොහොයුරිය​

නුඹ අත’ති අසිපතත් උදුරාන

අහිංසකයන්ගේම​ ගෙල සිඳින ​

කැට තියා  සූදු කෙළි 
නුඹෙම රැකවලුන් ගෙන්

කාසියේ වාසියට​

දූෂණය වුණා නුඹ​ නිතරෝම.

ඈත යාපා පටුන ඉමේ හිඳ​

මහත් අභිමානයෙන් නැඟී සිටි

අසිපතක් අත දරා

රෙදි කඩින් නෙතු  වසන

කන්‍යා සොහොයුරිය​,

නෙළුම් සුඹුලක් සදිසි දෙව්දුවක

අසපුවට යනෙන මඟ​ රැකහිඳ​

තළා හප කර දැමූ වියරු මෘග රැළම

පිටිතළ හයා බැඳ

​දක්කාන ගියා නුඹ​ ​
දංගෙඩිය දක්වාම.

අම්බපාලියකැයි

දොස් පරොස් අවලාද විඳි නුඹ​ම

අතුල් පහරක් ගසා 
රැකවලුන්​ නිහඬ කර​

කිරා මැන සමබරව තුලාවේ

පසිඳලා දුන්නාට​ යුක්තිය

නිර්මල හෘදයේ කන්‍යාව​,
යුක්තියේ දෙවඟන,​
නුඹට පිදෙනා මේ

කවිකාර මඩුවේ ප්‍රණාමය!​
පිළිගන්නවා සොඳේ.

මල්ලිකා එම් බණ්ඩාර

01.10. 2017​