අකුර සහ මම​

දෙවා ගුණ ණැන මිණි පහන් වැට 
එවන් එළියෙන් ලොව දකින්නට​

ජීවිතේ පන්නරය දෙන්නට​​

අකුර කිණිහිරයක් වුණා මට​​

මියුරු මීපැණි රස හඟින්නට

හලාහල විස​ පිටු  දකින්නට​

කියා දුන්නා වනසතුන් ගෙන්

මිනිස්වග දැන හැඳින ගන්නට

පහන් තාරකාවය දුරු කතර ඇවිදින්න​  ​

මිතුරු නෞකාව විණි දියඹ රළ බිඳ ලන්න​ ​

උතුරු කැඩපතෙකි මට මාව හඳුනාගන්න​

අකුර මහවේය දිවි ගමන පියවර මැන්න ​ ​

නොවරදින​ තුලාවකි මිනිස්කම​ මැන​ ගන්න​

සොඳුරු තක්සලාවකි ජීවිතය කියවන්න​

සිර මැදුරු පොළු මුගුරු වැට කඩොළු බිඳ ලන්න​

අකුර යගදාවක් ය​ ගිරි සිඛර සොලවන්න​ 

අවිදු ගනදුර මකා ණැන ණුවන දල්වන්න​

මහරු දිව​ ඔසුවක්ය අඳ දෙනෙත් පෑදෙන්න​

තියුණු මුවහත් සැතකි කටු අකුල් සිඳ ලන්න​

අකුර තෝතැන්නක්ය දිවිය​ අස්සද්දන්න​

ඉවුරු දෑලම යා කරන්නට​

පහුර විණි ගඟ එතෙර වෙන්නට​

කටු කොහොල් මත ඇවිද යන්නට​

අකුර මිරිවැඩි සඟල විණි මට​

මල්ලිකා එම් බණ්ඩාර​

29. 10. 2017