එකලාව​

සරද සඳ​ දියවරින්

මිහිතලය සනසනා

මැදින් පුරසඳ පළුව​

අහස් බඳ බබලනා

තුරුලතා වියන යට  

මල් දමින් සරසනා

විරාමය මදින් මද 
ගෙවෙන බව වැටහුණා  

එලා වැරහැලි පැදුර​

අම්බලම කෙලවරේ

අමා පල නෙළන්නට

පින් පිරුණ​ සුරපුරේ
විමානෙක හීන දැක​
නිදි නොමැති ගනඳුරේ

හිඳිමි ඇසෙනා තුරා 
සුරල් හඬ පෙරහැරේ 

නිමා නැති ගමන  
නියතව ගලායනු මිසක​

පමා කළ නොහැක 
වන පෙත සමඟ​ දොඩමලුව
අමාවක දිනක දල්වා
අතින් ගිනි සිළුව​
තුළාවේ බර වැටෙන 
අතට යමි යූහුසුලුව​

තනිව ආ බව දනිමි

නොබලාම සුබ නිමිති

තනිව යන්නට හැරෙමි

නොතියාම පෙර නිමිති

මල්ලිකා එම් බණ්ඩාර​ -

31. 03. 2018