සමු නොදුන් මිතුරා

කියාගන්නට දහක් දේ ඇතත්

එකතු වෙන්නට මඟක් අපට නැති

එකතුවූ කෙනෙහි වුව

හිතේ හැටියට යමක් කියන්නට

ඉසිඹුවක් නොතිබුණෙන්

​කාලයේ ඇවෑමෙන්,

අසා ගතයුතු දේම මඟෑරුන බව දැනී

යම් දිනක හිතට දුක දැනෙනු ඇති

ගිළිහුණේ කුමක්දැයි නොදනිතත්

එය මහඟු දෙයක් බව සිතෙනු ඇති

පහන් වැට පාමුළේ සෙමෙන් පිය නඟන විට​

අඳුර යනු කුමක්දැයි නොවැටහෙන්නටත් ඇති

පහන් සිළ දැවී ගොස් අඳුර මැද තනි වෙද්දි

සමු නොදුන් මිතුරාව හිතට ගොඩ වෙන්න ඇති

දැහැන් ගත කරන සිත අවදි වුණ මතකයක​

සිහින් සුවඳක් වගේ තනි වෙච්ච වෙලාවක​

බිඳුන වර පට මිසක​ බැඳුන ඉණිමං නොමැති

මියැදි ඊයේ මෙන්ම අදක් මිස හෙටක් නැති

ජීවිතය යනු කිමැයි හැඟෙන  විට​

සමුනොදුන් මිතුරා 
අපකෙරෙන් දුරස්වී හිඳිනු ඇති

මල්ලිකා එම් බණ්ඩාර

03. 03. 2018