විත්තිකාරිය​ ​

කොළපතේ දොවාලා

මා ඇකයෙ හොවාලා

රන් කිරෙන් සතපවා

රැකගතිමි නුඹව​

දෝලාවකින් ඇවිත්  ගෙනියන්ට

අගමෙහෙසියක පිණිස​ කුමරෙකුට
"නෑඹුල් මලක්ද නුඹ​?"

උන් අසනු ඇති නුඹෙන් 

මත් බමර තුඩු පහස​ නොල​ත්

ධවල නෙළුමක්ව​ පිපෙන්නට 
ගෙදිගු විල​ නැවුම් දිය 
උල්පතක් නොවූ බ,
මුව දොරේ අගුල් ඇර කියාපන්

මඩ ගොහොරුවේ ලැගපු  

අමන සූකර රැළ   

ඉඳුල් කර බොරකරපු

අනෝතප්ත විල මැද

බිඳ දැමූ නැවුම් දිය කොතලය​

නුඹම බව​ හඬගා කියාපන්

උන් යළිත් අසනු ඇති!
කන්‍යා මරියාද නුඹ?

"ජෙරිකෝවේ, “රහබ්” නුඹ බව
නිභයව​ කියාපන්

අගතියට පත් පාර්ශ්වයට

යුක්තිය ඉටු නොකළ​ පිය-රජෙකු

දෙවියන්ට​ ප්‍රියවීද මුරගා අසාපන්
"අම්මොන්" අතින් කෙළෙසුන

දාවිත්ගෙ දියණිය, “තාමර්”

නුඹම බව දිවුරා කියාපන්

තීන්දුව ලියන්නට පෙරාතුව​

සිහි මොළේ කැඳවලා

තුලාවේ බර කිරනු නොහේනම්
එවන් පියවරු, රජුන්, විනිසුරු 

අළු දූලි නොකරන

දෙවියන්ට​ දෙස් දෙවෙල් තියාපන්

දේව උදහසින් එන අවසාන විනිශ්චය

නියතවම  උන්ට බව කියාපන් ​

මල්ලිකා එම් බණ්ඩාර​

03. 06. 18