මේ අපේ උදාරවු .....

විභිෂණ, කතරගම​, වරුණ​ - දෙවි තෙද ඇති

ජන ගණා රැකදෙන්න නේක පුද ඉල්ලති 

එම දෙවොල් අධිපති - බස්නායකවරු තෙදති

සහසින් බැඳි පියළි - සමඟ පුද පෙත් හරවති

දෙවිවරුත් රවටා - දේව අබරණ පවා විකුණති

කෙත්වතු උයන් වතු  - ධන නිදන් ලැබ​ තරවෙති

රන්‍ රිදී බරණින් - හොර අඹුවන්ව සරසති

යාන වාහන සහ - සත් රුවන් වැසි වස්සති

රටට ඔළුගෙඩි ඇති - එහෙත් මොළ කළඳක් නැති

සුඛ විහරණය රුති - ජන නාවරුන් බිහිවෙති

රජ සිටු මැති ඇමති - කුමර කුමරියො උහුට​ අභිමති  

දිය කෙළි උයන් කෙළි - අනඟ රඟ සැණකෙළි පවත්වති

සඟ ගණ​ මහ බලති - පඬූරු කැට වල පුරවති

ණැන පහන් සිළ නිවති - දුසිල්වත්හුම​ බණ වදාරති

බුදිති කැළි කුණු අධිපති - විඳිති පස්කම් සැපම නොනැවති

හුදී ජන කැල අමනගති ඇති -  පුදති දන් පෙත් සිව්පසය නිති

අහෝ හිස් ඔළු ඇති -  මෝඩ ගොන් රැළ මඟ හිඟා කති

උන්ගේ දරුපැටවුන්- කුස පොතු සයින් වේලෙති

කිරි කඳුළක් නොමැති මවුන් ළයමඬල හප කරවති

කිරිකළ දහසකින් - බෝසමිඳු බඳ නහවති

ගුණ ණැන දැනුම ඇති - දිසාපාමොක් විරුද​’ති

තක්සලාවේ අධිපති - ශිල්ප දක්වන්ට පසුබට​ වෙති

නෑඹුල් දෝණියන්ගේ - මස් ලේම ඉල්ලති

මව්වරු වුව හැඩති -  පිළිකෙව් නොකර වළඳති

 

 මල්ලිකා එම් බණ්ඩාර​

 09. 06. 2018