වසා මං පෙත් කොටු පවුරු බැඳ
ලවා කටු බැමි අවුරලා
සොරාගත් ලොව දිනාගන්නට
වහල් කම සිත දුරලලා
එකාවන්වී පියාඹන්නට
තටුසලන මගෙ දරුවනේ
නොකා කුසකට දිවා රෑදෙක
මඟතොටේ රැඳි විරුවනේ
ගඳ කළල් මැඬ නැඟී දිරියෙන්
හිඳින නුඹලා දුටු වෙලේ
කඩා වැටුණා මගේ හදවත
පුතේ නුඹලගේ පාමුලේ
උපන් නූපන් දැයක අසිරිය
දකිනු රිසියෙන් තුන්හෙලේ
සුවහසක් නව මල් පිපේවා
දැයක නිවහල් විල් තලේ
මල්ලිකා එම් බණ්ඩාර
27. 06. 2022
තෙල් හිඳී ගිහින් පතුළට
පහන් තිර
ඇළී අළුයට
යාන්තමට දැල්වෙන
ගිනි සිළුව
වැනෙනවා
අතීත සිරි විභූතියක
නෙක විසිතුරු ගුණ වරුණා
සුරංගනා කතා පෙළක
මතක මැදින් තළු මරණා
පුරාවතක් වැටී
සුවඳ දුම්
දෙවා මොනවට
පව් කඳන් හුයෙන් බඳිනා
සෙත් පිරිත්
පැනින් දොවනා
අසපු මාළිගේ
පංච කාම සම්පත්
විඳ
පෙරමුණේ වැඩිය
යතිවරු
කෝටියක් උතුරු
සංවර සීලෙ බිඳිනවා
දරා ගිනි
පුළිඟු හිස මත
ගොල්ල වරිගෙ
රැකගන්නට
රාජකීය මැති
ඇමතින්
පේවීලා සපිරිවර
හා
කිරුළ රකින්නට
තිරුපති වඳින්ට යනවා
හොර මුළක්
වැදී රජගෙට
කොල්ල කා
සියළු යසිසුරු
තල්ලු කළෙන්
රට අඳුරට
ඇඳි වතත්
තියා උගසට
යන්ට කල්
ඇවිත් මඟ තොට
අල්ල පා හිඟා
කන්නට
කොල්ලනේ වරෙව්!
පළඳලා සිරස
මල් දම්
නටා නෙක බහුරු
කෝලම්
වළඳලා නේක
කම් සුව
පිරිහිලා
කරපු පෙර පින්
ඉරාගෙන සළුව
සබයේ
යම පුරේ යන්ට
නිරිඳුන් දවස් ගණිනවා
මල්ලිකා එම්
බණ්ඩාර
1.02.2022
දින සති මස් ගෙවුණි දරුවන්
මඟට වෙලා
ඉත්තෑවෝ ගුලට අණසක පතුරවලා
ගිනිගත් රට නිවන මංපෙත් ඉවත
හෙලා
ඌරෝ මඩ තළති ගාලට එකතුවෙලා
අටුකොටු හින්දුවෙන් පාලක හොරදෙටුවෝ
සාධාරණය ඉල්ලති පුරවැසි දරුවෝ
උන්හට ගිනි බිඳිති අවිගත්
නිලදරුවෝ
ලේ රස විඳිති රට කරනා අම්බරුවෝ
කන
බොන යනෙන හැම දේටම දුනු විද්ද
පාලක
පැළැන්තිය රටටම දුන් සුද්ද
යහතින්
මැදුරු වල නිදි, නැතුවම සද්ද
ලඟදිම
ගහයි අපෙ ඇඳි වතටත් බද්ද
මල්ලිකා එම් බණ්ඩාර
23. 04. 2022
පයින් මැඩ විසකුරු සපුන් හිස
රෙදි
කඩින් දෙනුවන් වසා බැඳ
සුරත රැඳි
අසිපතේ මුවහත
නොබැලුයෙන් නුඹ විණිද වෙසඟන?
ධවල පිරුවටයට
මුවාවී
මුව අගුළුලා
හිරි ඔතප් බිඳ
රුහිරු පැල්ලම්
මැකෙන්නට වත
නිදොස් කොට
නිදහසක් කුමටද?
මළ
බැඳුන අසිපතේ මුවහත
දිදුළු
දෙයි අසපුවේ දසඅත
දැලේ
පැටළුන තෝරු මෝරුත්
තුලාවෙන්
පැන යන්න දඟලත
පැහැර ගෙන
අතරැඳි තරාදිය
කිරා මැන
දන, ධන නිදන්
නුඹව
අපහරණය කරපු උන්
දංගෙඩියටම
දක්කපන්!
උත්තරීතර
පුස්තකේ කෙළසා
ඉරා පත් ඉරු
මකාදා වැකි
සිහසුනේ හිඳ
ගැසූ කරණම්
විත්ති කූඩුව
අයිලයෙන් බැස
සිපිරිගෙයි
දොරටුවට ගාටත
නිමාවි දෙතොලත
රැඳුන විත
හලාහල විස
මුවග තැවරෙත
ගැල හඹා යන
විලස රියසක
ලෝ දහම විනිසුරෙකු
වී ඇත
පසිඳලන නීතියේ අබිමත
අරා හිඳි දෙවඟනගෙ දෙවොලත
දුහුල් සළුවේ
ඉස කළල් මඬ
තුලාවේ රන්මසු ගැටෙන හඬ
තවත් නම් නෑසිය යුතුව ඇත!
මල්ලිකා එම්
බණ්ඩාර
28. 05.
2022
තළා කටු සැමිටියෙන්
මඟ දිගේ අඩනිරුවතින්
ලොවක් අභියස දූෂණය කර
කෙළගසා ඇණ ගසා
කුරුසගත කළ මියැදෙන්න
දේශයේ ආත්මය
උත්තානවී හිඳී
පණගසා නැඟිටින්න
මුවදොරින් ගිඟුම් දී
අහස් ගැබ පුපුරන්න
නිදහසේ විරු ගීත
සිසාරා ජපවෙන්න
වහල් බැමි සිඳ දමා
විලංගුව බිඳ ලන්න
දැන් ඉතින් කාලයයි
නවමු මල් පූදින්න
මල්ලිකා එම් බණ්ඩාර
21. 04. 2022
පිරියම් කරපු සිත් පිත් නැති ගිනිදණ්ඩ
උණුසුම් කරනු ඇති සීතල වෙඩිඋණ්ඩ
දම්සක පැළඳි උරතල මත අනුකණ්ඩ
හරවන්නට එපා මැදහත්වී ඉන්ඩ
වෙඩිමුර තියා බිහිදොර ළඟ රජමැදුරු
එඩිතරකම මිසක් අත නැති ගල් මුගුරු
සිහධේනුවක සේ පිරිවර හා ගිගුරු
දෙමි හිරුණිකා බලකායට මල් පොකුරු!
දොර දොර දූ පුතුන් උහුලා සාගින්න
මොරදෙන කොට හැකිද මවකට ඉවසන්න?
බැණ අඬගසා සළුපිළි ගලවා ගන්න
නිවටුන් වුණා රට කෑ පාලකගොන්න
අව් වැහි කකා පෝලිම් වල දුක් විඳිනා
පියවරු මඟ මියෙති නොමැතිව හව්හරනා
හොර දෙටුවෝ විඳිති සුව පහයෙහි යෙහෙනා
දින ඈතක නොවේ තොපි දෙදණින් හොවනා
අපරාජිතව රැකගන්නට හෙළ දෙරණ
තිර අදිටනින් කඳවුරු බැඳ වෙර දරණ
ජාතික අරගලය නව ජවයෙන් පිරුණ
පෙරමුණ ගෙන හිඳී ගජතුන් කැළ තරුණ
අව් වැහි හුළං මුදු මල් පියවිලි වේවා
දළ රළු දිය අහර දිව බොජුනක් වේවා
දරුවෙනි, යෝධ සවිබල පිරිපුන් වේවා
අපරාජිත දැයක ජය ටැම් ඉදි වේවා
මල්ලිකා එම් බණ්ඩාර
27. 04. 2022
නිදිගැට හැර නැඟී ගජතුන් දළ බිඳිමු
රුපුනොද බිඳින අසිපත් දුනු හී හදමු
උරතල පසා කර ඒ කවි ගී විදිමු
ජන අරගල බිමේ හෙට දිය දද නඟමු!
මඩ ගොහොරුවෙන් ලක්මෑණිය ගොඩගනිමු
සූකර රැලම අවමානෙන් පිටුදකිමු
නව යුගයකට නව මංපෙත් ඉදිකරමු
පෙරදිග මුතු ඇටය බැබලෙන්නට හරිමු
අභිමානවත් ජාතියකට දුන් සෙවණ
නරාකාදියක් කළ මිහිමත ගිනි ගැනුණ
සොරමුළ හඹන්නට මඟ පෑගුන වැටුණ
දුහුවිලි ගසා නැඟිටිව් දරුවෙනි තරුණ!
මල්ලිකා එම් බණ්ඩාර
26. 04. 2022
