නියත විවරණ

දුරුතු පුරහඳ ​නිසල රෑ මැද

ළතණ පත් මත ඉසින පිනිපොද

ගම් නියම් ගම් දවාලන්නට

ගිනි පුළිඟු සේ පතිතවූ බව

හැඟිනි මල් පියවිළි ඉසුන මඟ​

දැනී අප යළි හමු නොවන වග​

භවෙන් භවයට ඇවිද ලුහුබැඳ​

ඔබට පමණක් පිදූ හදවත

සපා කොනහා තළා මිරිකා

නිහඬ කළ​ පෙර දින​ සැඳෑවේ

නුඹට මා අබටක් තරම් බව​  

සක් සුදක් සේ හැඟිණි මොනවට​

කියා ගන්නට හිතට දිරි නැති

මගේ අවසන් පැතුම දවටා  

සුසුම් වැල් සුළඟේ වඩිනු ඇත​ ​

පෙම්පතක් වී ඔබගේ දෝතට​;

"ඉතින් යළි මේ සසර ගමනේ

සරා කෙලවර වන තුරාවට​

අහම්බෙන් හෝ අතර මඟකදි

හමු නොවේවා යළිත් නුඹ මට​..."

- මල්ලිකා එම් බණ්ඩාර​ 

- 31. 12. 2018