දුරුතු පුර සඳ

වළා විරහිත ගගන තලයේ

කලා සපිරුණ දුරුතු පුර සඳ

දුලා රන්සුණු ඉසින යාමේ

බලා රත් පැහැ ගැනෙන තුනු බඳ​

ඉබාගාතේ ඇවිද වෙහෙසී

අවදිවෙන හෙවැනැලි අතර හිඳ​

පෙරුම් පිරුවේ වෙලා ගන්නද​

ළයමඬල ​තෙරපෙන වියෝගය​?

ඉපිද මියැදෙන නැඟෙන​ බැසයන​

නොනිමි සිතුවිලි ගඟේ දළ රළ ​

අතර​ පාවී නොයන් දියඹට

චණ්ඩ මාරුතයේ පහර වැද​

ඉරා විසකුරු සිතැඟි නිරතුරු

වෙළෙන මායා තිමිර පට බිඳ​

බලන් ජීවිත නවාතැන්පළ​

කෙම් බිමක් සේ භව​ කතර මැද​  

වෘක දේනුවකගෙ විලාසෙන්

හඬා වැළපී මුලාවෙනු කිම​?

ජීවිතය යනු මියුරු ඔසුවකි
සසර ගමනේ වෙහෙස දුරැලන​

මල්ලිකා එම් බණ්ඩාර​

20. 01. 2019