අපේ ගම​

 වැටියේ මිදෙල් මල් දම් වියනක් බැන්ද​

බක්මී දොඹ කරඳ සෙවනේ මන නන්ද​

යාකර ගම් දෑළ ගුරු ගෙදරට බැන්ද​

ගල් ඒදණ්ඩ ගිල දැමුවේ කවුරුන්ද​?

 

සූරිය මල පිපෙන කන්දට වහන් වෙලා

මායිම තැනූ ගම්මානෙට පිටින් එලා

දිග්ගල මහ පවුරු සයනය මුණින්තලා

ඔලමොළ අමනයින් විකුණා දමති තළා

 

පිං ලිඳ දිවා රෑ උතුරන නිල් කැටය​

නිව්වේ සා-පිපාසා මඟියන් හටය​

පන්සල මැඳුර දිය මල​ පිහිනුම් තටය​

දියවර​ යතිඳුන්ට බරපැණ දුගියටය​

 

උල්පත් දියෙන් වපුරා යල මහ කන්න​

හත්මුතු පරපුරම නිව්වලු කුසගින්න​

පීදෙන රන් කරල් අටුකොටු පුරවන්න​

ගව්වක් දිගට ඇතිරූ පළසක් වැන්න​​

 

සියවස් ගණන් ඉපැරැණි ගම් තුලානේ

රුක් දෙවියන්ට කැප කළ දෙව් විමානේ

ඉස්සර ඔරු පාරු බැඳි සියඹලාවේ

අතු පෑහුවේ කවුරුද හත්වලාමේ

 

මල්ලිකා එම් බණ්ඩාර​

19.07.2023