පව් කන්ද පාමුල

හිටී පිළිම​ ඔත් පිළිම හිඳින සැතපෙන පිළිම​

ශෛලමය දැවමය​ විශාලම​ සහ​ උසම

ඉදිවෙතත් තරඟයට

ගමේ නගරේ හෝ කළාපේ 

ආගම​ දහම නොපිළිපැද​

නිවන් ඉල්ලන රූප වැඳ වැඳ

මර බියෙන් තොර රැයක් ගැන

තවම ඇත්තේ සිහිනයක් නම් 

​මිත්‍යාව ලුහුබඳින නුඹලාට​

පතිරූප දේශය කොයි තරම් දුරකද?

මේකප් දැමු මුහුණට

මිහිරි හඬ සහ​ මුඛරි දෙසුමට​

ලෝල නැණ මද සැදැහැ පුඟුලෝ

පිරිවරාගෙන මහමඟ

රඟති කැමරා ලයිට් මැද්දෙන්

බෝසතුන් ඉපදී බුදුව

මිණී පළඟෙහි හිඳ කරන දේසනාවට

සාදු කාරදෙති දනෝ

පස්වනක් ප්‍රීතියෙන්

එද, අහෝ එහැම නළුවෝය​

පව් කඳුය

පස් කඳුය ​

නිවන් මඟ අවුරණ​.

ඉතිහාස පොතේ හිට පෙළ පොතේ පිටුපුරා

හිරිකිතේකින් තොරව බොරුව සිහසුන් අරා

ජාතියක් ජන්මයක් කියන්නට කටපුරා

තියේනං කියාපල්ලා දෙයක්!

තිරිසනෙක් ගෙන් පැවත​ එන​ බොලෑ ජාතකේ

රාජ වංසෙකට ඈඳන්ට ලැජ්ජා නැද්ද​

​මං පහරනා හොරමුල ගෙනා නැව් කබල​

තම්ඹපණ්ණියට ඇවිදින් අහඹුවෙන් වගේ

කුවේණිට කරපු අතවරය මදිවාට​

ද්වේශ සහගතව දරුවන් සමඟ අතහලෙන් ඇය​

ගෙවාපල්ලා වන්දි සනුහරේ උන්

පාපයේ සාපයෙන් මිදෙන්නට​