මතක පොත

මතක පොත(මියගිය යෙහෙළිය සිහිපත් කරනු වස්)

පෙතිකඩක අඳින ලද සොඳුරු සිතුවමක්සේ

මතකයේ නිම්වළලු දිගහැරෙයි අනන්තෙට​

ගහක කොළ මදිවෙන්ට දැනෙන  දුක කිව්වාට 

කඳුලකින් වෑවෙයිද ඉකිබිඳින මගේ සිත​​?

ළහිරු මල්පෙති විදා කඳු මතින් ගලාඑන,

සොඳුරු අරුණෝදයේ අතිමියුරු සුවඳ මැද

කිරිවැදෙන නිල් ගොයම සිසාරා  ඇදීයන​

කිරිකොක්කු දෙපලක්ව ලතාවට

මැදෑලේ නියරමත  හෙමිහෙමින්​  පිය මැන්න

ඒ නැවුම් යොවුන් විය අපිදෙන්න​

මගෙ මතක පුරාණය බොඳ වෙලා

නුඹ නොමැති කාන්සිය දෙනෙත් යට දියවෙලා

සීරුවට මැදපු සුදු රැළි ගවුම

සුළඟ හා  පොරබදන කරපටිය​

පොත් ගොන්න තුරුළු කර දෝතින්ම​

මහ වෙලේ කුඹුක යට මම තවම​ තනිවෙලා

මඳ පවන් වැද සැලෙන මුදු සරෙන් සිනාසෙන

රන් කරල් කළාලය දිගේ පියවර මැන්න​

සිප්සතර දැන ඉගෙන නව ලොවක් සොයාගෙන

සරසවියෙ දොර අගුළු විවර කර ගෙන සොඳින​

කාලයේ වැලිතලා,  ගල්තලා, මල්තලා

පසු කෙළෙමු හඬා යළි සිනාසී සුසුම්ලා

වැලි බතින් පටන් ගත් මිතුදහම නොතකාම​

ජීවිතේ මංපෙතේ දිගු දුරක් නොරැඳීම​,

නුඹ තනිව සමු අරන් නොකියාම නොදොඩාම​

මතක පොත මා අතය තනිව කියවනු කෝම​​?

2012