උඩුගං බලා පිහිනීම​

තැම්ඹූ සිනිදු මුදු පිරුවට වෙල්ලෑවේ

අමුණේ දමා  සෝදා කිරි සුදට සුදේ

කරගැට මල් පිපුණු දෑතින් මිරිකාලා

වැනුවා ගිහින් රංදෙනිවෙල පිල්ලෑවේ

කිරිකොක් රෑන් ඉගිලෙද්දී ඇල දෑලේ

ගම් මැද්දම ඇදෙයි අකුරට​ ඉස්කෝලේ

මගෙ නෙත සමඟ සිත උන් ලුහුබඳින කොට​

කුල ගොත් විලංගුව වැටුණා මගෙ පයට

ලිප ගිනි මෙළවෙලා කුසගිනි නිවීමට​

බත රත් වෙද්දි වත පීදෙන හිනා මිට​

දරු පැටවුන්ට පිරුළට පිළි දැරීමට​

කල ගතවුණා වෙල්ලැවේ ලැගීමට

හවසට පිච්චමල් වට්ටියකට දමලා

මිදුලේ පහන් පැල පාමුල දණ නමලා

අකුරට යන වරම් ලබනුව දරුවන්ට

මම කන්නලව් කෙරුවා හැම දෙවියන්ට

පරවේණියෙන් ජීවන තොට​'මුණගාව​

මගෙ උරුමය වෙලා තිබුණත් වෙල්ලෑව​ 
දරුවන් ලද යුතුය ජීවන කොල්ලෑව​
නවතින​තුරා මහසයුරේ ඉම ගාව​

මල්ලිකා එම්. දෙමටදෙණිය - 2003