සම්මතයේ අසම්මතය

කොකේසියානු බිරිඳ තුරුළු කරගත්

මහ කළු සිංහලයා දැක

හිරු නොබසින අධිරාජ්‍යය පරාජය කළ​

වීරයෙකුය යන අභිමානයෙන්

මඟ දෙපස රැඳුන පුරවැසියෝ බලා සිටියහ​.

තළෙලු තරුණියකවූ කුවේණිගෙ දියණිය​

කොකේසියානු සැමියා හා සමගාමීව

මහ මඟ ගමන් කරන විට​

රාවණාගේ අවජාත පුත්තු

අසැබි වදන් කැට මුඟුරින් දමා ගැසූහ​.

රිදුනු සිත ලේ කඳුලක්ව ගලනතුරු හැඬුවාය​ ඈ

ගැහැණියක වූ පවට​

වියතක් තරම් පටු ඇඳුම් කඩකින්

විළි වසාගත් ඒරොප්පෙ ගැහැණුන්

දළදා පුදබිම අසල වීදි සරද්දී,

කානිවල් එකේ අඩ නිරුවතින් රඟද්දී

සඟ රජවරුත් රැක්කෝය මුනිවත ​

ඩෙනිම් දිග කලිසමක් 
ඇඟට හිරට ඇඳ මහ මඟ යන යුවතියන්

පරගැති සිරිතට හුරු වෙතැයි විස්සෝප වූහ වියත්තු

කම්පා වූහ දිසාපාමොක්වරු ​.

අන්තර්ජාල සයනයේ නිරුවතින් හිඳින​

තම දියණිය  නිදහස් මතධාරී මොඩලකැයි ​උදන් ඇනූහ. 

සයිබර් අවකාසයේ රැජිණයැයි ​තලුමැරූහ මා-පියෝ

කුසපොත්ත තෙමෙන්නට ඉඳුලක් නැතිවද​

ළපටී කිරි දරුපැටවුන්ට

දෙතොල තෙමා ගන්නට කිරි කඳුලක් නැතිව​

සාගිනි මැළය දැල්වුණත්

ලිප ගිනි නොමැළවෙන පැල්පතේ

රජවරුන් අභිශේක කරන්නට​
කිරිකළ දහසකින් බෝ රජු දොවන්නට 

වලිකන ගොබලුන්ට මොළේ කළඳක් දෙවන් දෙවියනේ

ලෝක පාලක දෙවියනේ!

අරාජක දේශයේ අනාගතයක් නැති මිනිසුන්ට​

නූපන් හෙටක් සිහිනයේ සිරගත​ කොට 

ඡන්ද පතළේ මිණිකැට අහුලන තක්කඩින්ට ​

ආත්මය පාවාදෙන මිනිසුනේ

බිඳරැදා දෑස්වල​ තිමිර පට
සොයාපල්ලා සත්‍යය​  

වැළඳ ගනිල්ලා යුක්තිය