කාලො අයන්තෙ

ජාතියේ කප්‍ රුක වසාගත් දේශපාලන පිළිලය​

ජාතියම සපාකා උරාගෙන සාරය​

අනාගත පරපුරම හිලව්වට තියා

ලෝකයට ණයකාරයන් කළ අමන රැළ

කඳ බඩ මහත්ව බෙල්ල ගිලුන මැටි රූප​

සතපවා ගොඩ​ ගසද්දී කාසි;

ලොවම සුවඳවත් කළ හැකි
මඬ වගුරු වල පිපුණ සුදු නෙළුම්

සැඟවුණා ලේ පැහැති මළ හිරු
සිතිජ ඉම ගිලෙද්දී

නීතියේ කන්‍යාව​ දූෂණය කර​

අවනීතිය සිහසුන් වඩා හිදුවා

පොදුදනා ප්‍රවේණිදාසයන් කළ

හිස් බඳුන් හා සදිසි පාලක පැළන්තිය​ උන්ට මිස​

තොප වෙනුවෙන් ඉදිකළ ලොවක් නැත්තේමය​

උන්ගේ පැවත්ම උදෙසා ඉදිකළ​ 
ප්‍රවේණිදාසත්වයේ පවුරු පදනම් බිඳ දමා               
නුඹලාගේ ලොව ගොඩනඟන 
කාලය එළඹ ඇත​  
දේශයේ දරුවෙනි අවදිවව්!

MB - 24.08.2012