කිරි කජු කෙල්ල

  

ගල්ලෑලි පොත් දැමූ​ පුංචි පන් මල්ල ගෙන

අපුච්චා ගෙනා පොඩි මල් ඉහුණ ගවුම ඇඳ​

මකුළු දැල් මත රැඳුණු පිණි පොකුරු පයින් මැඬ​

පාසලට ගිය අයුරු කොයිතරම් අපූරුද​​?

බක්මී මල් සුවඳ මැදින් මිදෙල්ල මල් වියන යටින්

නිල් තණ බිස්සේ ඉහිරුණ මල් පෙති පාවාඩ මතින්

මැදෑලෙ ගල් ඒදණ්දෙන් එගොඩ වෙලා මහ නියරට​

දෙමලිච්චන් රෑන වගේ දොඩමලුවී එක පොදියට​

දොළොස් මහේ පහන වගේ එළිය බෙදූ ගම්මානෙට​

පිවිතුරු දෙවොලක් වාගෙයි ඉස්කෝලේ පුංචි අපට​

​කිරිකොක් රෑනක් වාගේ  සීරු මාරුවී පෙලකට​

 බඹරු රඟන හිමිදිරියේ පියමං කෙරුවා අකුරට​ ​

කොරකහ ගස් අතර බලුදං පඳුරු යට​

කිරිදත් දෙපෙළ නිල් පැහැයට හැරුන විට​

ඉහිරෙන ටිකිරි හස රැළි සිත නිවන විඩා

මිහිරිය සැළෙන රන් රසු දැල් වලට වඩා

ලස්සන ගවුම කජු පුහුලන් කහට වැටී

නව හැඩ තල මවන මුත් නෑ හිතට දුක​

ඒ කිරිකජු කෙල්ල මමදැයි සිතෙනවිට​
මගෙ හිත​ බොඳ වුණා නොදැනිම දෙනෙත යට​