පසු තැවිල්ලක්

කොතරම් කෙටිද දින සති මේ ලොව නෑගේ

දින සති ගෙවී යයි නොදැනිම දැන් මාගේ

තිබුණත් නැතත් වරදක් සිදුවී වාගේ

මගෙ දූ කතා නෑ දැන් ඉස්සර වාගේ

ඉටුවී නැතත් යුතුකම් මාතින් දූට​

මං මග බලනවා ඈ එන තුරු රෑට​

ඇස නොගැටුනොත් ඇගෙ රුව සමහරදාට​

මගෙ නෙත ඉකිබිඳී නොඇසෙන්නට ඈට​

මගෙ හිත මිරික මිරිකා කොනහන නේක

නුඹ සැරැසුනේ ඇයි සඟවන්නට මේක ​

අම්මා හිතන හැටි දැනගත් යම්දාක​

නුඹෙ නෙත බොඳ නොවේවා දුරු රට ගේක​

ඉර හඳ උගුල්ලා දුන්නද උඹෙ අතට​

මැව්වද තාවතිංසය ඇස් පනා පිට​

හිතුනේ නොපෑහෙන දීගෙක බැඳීමට

පෙළවහකට කෙනෙක් නැතුවද හතරවට​