යුක්තිය උදෙසා

සිහින ලෝකේ පාවුණා අපි - මෙතෙක් කල් නෙත පියාගෙන හිඳ

හිම කුමාරියො වුණා ඇති නෙව​ - කොතෙක්නම් තව මුලා වෙන්නද

​නැගී සිටිමුව දිරිව එදිරිව - කාන්තා හිංසනය අබියස​  

දැන් ඉතින් කාලය ඇවිල්ලා - සහෝදරියෙණි නැඟිටපල්ලා

ගැහැණු බව ගැහැණියක් වීමෙන් - කුවේණිය පැරදිලා වන වැද​

යොවුන් දොර එලිපත්ත මතදිම - නැවුම් බව ගැබ් බරව ඉකිලත​

කිරි වරා නැති සිඟිති දූවරු - තිරිසනුන් අත කෙළෙසිලා යත​

පැසුනු වියපත් වියේදී වුව​ - අපට රැකවරණයක් තිර වෙද​ ?

නීතියේ කන්‍යාව අන්ධය - තුලාවේ කහවනු රැඳෙන සඳ​

ඇවැසි තැන නැති ඇගේ කඩුවෙන්- ගෙදර හිඳ අපි කොස් කොටන්නද​?

මවද, සොහොයුරියද, දියණියද - රකිනුවස් එක අරමුණක හිද​

මොර ගසල්ලා බිඳ​'ර මුනිවත ​- සහෝදරියෙනි පෙරමුණට වැද​

සදාචාරයෙ නීච බියගුලු කඩතුරාවෙන් වසා ගත සිත​

වහළියකසේ කැඹුරුවා මිස, සිප් සතර හිණි පෙතක්වී නැත

පිළුණුවූ සිරිතට චිරන්තන පිටු නොපා ගැලවුමක් නම් නැත

කුමට “කෙළි බඩු කුලඟනක්වී” ගැහැණූකම මිහිදන්ව ඇති විට​ ​?​

අපේ අයිතිය අපට යුක්තිය මෙන්ම සාධාරණය ඉල්ලා

අපේ අබිමානය දිනන්නට​ - හිතින් අරමුණු කර ගනිල්ලා

​සිඳ දමා වැට කටු කොහොල් දිරි දෙපා යුග මත නැඟිට​පල්ලා

බිඳ දමා විය ගසෙහි වරපට​ - උරෙන් උරදී පෙළ ගැසෙල්ලා

අනාගත ගැහැණිය මුදාලන මෙහෙයුමේ මෙහෙවරට උරදී

කාන්තා නිදහසේ සිහිනය සැබෑ කරගනු පිණිස දිරිදී

ඉඳින්; "සිසි වන උවන ඉඟ සුඟ” නොරැවැටී රාගික උවම් ළඟ​

බර දරන “පුළුලුකුළ රිය සකයුරු තිසර තන " ඇයි සුනංගුව​?

තිරව නැගිටිමු ​ අභිමනින් - බිඳිර දෙපයේ ලූ විලංගුව !​